رام اللہ (روز نامہ قدس ۔آن لائن خبر رساں ادارہ) اسرائیل کی ’’عوفر‘‘ جیل کی انتظامیہ نے فلسطینی جیل میں لگے جیمروں کی شدت بڑھا دی ہے۔
روز نامہ قدس کو موصول ہونے والی اطلاعات کے مطابق فلسطینی محکمہ امور اسیران کی طرف سے جاری کردہ بیان میں کہا گیا ہے کہ اسرائیلی حکام نے حالیہ عرصے کے دوران ’’عوفر‘‘ جیل جیمروں کا درجہ اور شدت میں اضافہ کر دیا۔
بیان میں کہا گیا ہے کہ فلسطینی اسیران کے خلاف اسرائیلی ریاست کے انتقامی حربوں میں مسلسل اضافہ ہو رہا ہے۔ اسرائیلی حکام نے اسیران پر سختیاں بڑھانے اور ان پر عرصہ حیات تنگ کرنے کے لیے جیمرز کی شدت اور دائرے میں اضافہ کر دیا ہے۔
بیان میں مزید کہا گیا ہے کہ اسرائیلی حکام نے جیلوں میں قیدیوں کے کمروں کے تالے بڑھا دیے ہیں۔ قیدیوں کے کمروں کی تلاشی باربار دستک اور جیلروں کی تعداد میں اضافہ کر دیا ہے۔
فلسطینی محکمہ اسیران کا کہنا ہے کہ اسرائیلی حکام کی طرف جیلوں میں نصب کردہ جیمروں اور دیگر آلات کی وجہ سے اسیران کے سر درد اور جسم میں تکلیف کی شکایت عام ہو چکی ہے۔