(روز نامہ قدس ۔آن لائن خبر رساں ادارہ)فلسطین کے علاقے غزہ کی پٹی میں اسرائیلی فوج کی سرحدی دراندازی کا سلسلہ جاری ہے۔ گذشتہ روز قابض صہیونی فوج نے غزہ کی جنوبی سرحد پر دراندازی کی جبکہ قابض صیہونی فوج نے غزہ میں فلسطینی ماہی گیروں اور کسانوں پر فائرنگ بھی کی۔
مقامی فلسطینی ذرائع نے بتایا کہ قابض صہیونی فوج نے جنوبی غزہ کے علاقے خان یونس میں عبسان الکبیر کے مقام سے دراندازی کی۔ اسرائیلی فوجیوں کے پانچ بلڈوزرغزہ داخل ہوئے اور انہوں نے فلسطینی اراضی کی کھدائی کی۔
ذرائع کا کہنا ہے کہ قابض صہیونی فوج نے غزہ کی پٹی کی مشرقی سرحد پر رفاح کے مقام سے فلسطینی کاشت کاروں پر مشین گنوں سے فائرنگ کی تاہم اس فائرنگ میں کسی قسم کے جانی نقصان کی اطلاع نہیں ملی۔
ادھر قابض فوج کی بحریہ نے بھی فلسطینی ماہی گیروں کی کشتیوں پر اس وقت فائرنگ کی جب وہ سمندر میں ساحل سے صرف تین ناٹیکل میل اندر مچھلیوں کا شکار کر رہے تھے۔