(روزنامہ قدس ـ آنلائن خبر رساں ادارہ) قابض اسرائیل کے سفاک صہیونی آبادکاروں نے شمالی وادی اردن میں فلسطینی کسانوں کی درجنوں ایکڑ زرعی زمینوں پر دھاوا بول کر ان پر قبضہ جما لیا اور ان میں ہل جوت ڈالا۔
مقامی انسانی حقوق کے کارکن عارف دراغمہ نے بتایا کہ درندہ صفت صہیونی آبادکاروں نے شمالی وادی اردن کے علاقے عین الساکوت کے قریب تقریباً پچاس دونم غیر آباد زرعی زمینوں کو ہل چلا کر اس پر قبضے کی کھلی کوشش کی ہے۔
اطلاعات کے مطابق وادی اردن کے مختلف علاقوں میں صہیونی ظالم آبادکار فلسطینی شہریوں اور ان کی ملکیتی زمینوں پر مسلسل یلغار کر رہے ہیں۔ ان حملوں میں نہ صرف فلسطینیوں پر جسمانی تشدد کیا جا رہا ہے بلکہ ان کے مویشی چرا لیے جاتے ہیں، پانی کی سپلائی لائنوں کو تباہ اور بعض کو چوری کیا جا رہا ہے تاکہ مقامی آبادی کو اپنے ہی وطن سے ہجرت پر مجبور کیا جا سکے۔
واضح رہے کہ قابض اسرائیلی فوج کی سرپرستی میں جابر صہیونی آبادکاروں نے مغربی کنارے کے مختلف حصوں میں فلسطینی اراضی پر قبضوں کی کارروائیوں کو تیز کر رکھا ہے تاکہ وہاں مزید غیر قانونی صہیونی بستیوں کی بنیاد رکھی جا سکے۔
