(روز نامہ قدس ۔آنلائن خبر رساں ادارہ)فلسطینی تنظیم سرايا القدس (اسلامی جہاد کی عسکری شاخ) نے غزہ کے حوالے سے حماس اور غیر قانونی صیہونی ریاست اسرائیل کے درمیان طے پانے والے جنگ بندی معاہدے کی پابندی کا اعلان کرتے ہوئے اعلان کیا ہے کہ اگر صیہونی ریاست نےخلاف ورزی کی تو ردعمل شدید ہوگا۔
سرايا القدس کے عسکری ترجمان ابو حمزہ نے اپنے بیان میں کہا:”ہم معاہدے پر عمل درآمد کے لیے پُرعزم ہیں، بشرطیکہ دشمن بھی اس کی پاسداری کرے۔ تاہم، کسی بھی خلاف ورزی یا جارحیت کی صورت میں، ہمیشہ کی طرح ہم اپنے عوام اور مقدسات کے دفاع کے لیے تیار ہیں۔”
ابو حمزہ نے کہا کہ سرايا القدس موجودہ قیدیوں کے تبادلے کے معاہدے میں شامل ہے اور جلد ہی اس کے تحت دشمن کے چند قیدیوں کو رہا کیا جائے گا، جو مرحلے کے پہلے حصے کی شرائط پر پورا اترتے ہیں۔ یہ اقدام کتائب القسام کے ساتھ مکمل ہم آہنگی میں ہوگا۔
عسکری ترجمان نے قطر اور مصر کے بھائیوں کو خراج تحسین پیش کیا، جنہوں نے اس معاہدے کی کامیابی اور تکمیل میں اہم کردار ادا کیا۔