رام اللہ (روز نامہ قدس ۔آن لائن خبر رساں ادارہ) سال 2018 کے اختتام اور 2019ء کا آغاز ایک ایسے وقت میں ہو رہا ہے جب اسرائیلی زندانوں میں پابند سلاسل سات ہزار فلسطینیوں میں 19 فلسطینی صحافی شامل ہیں۔
روز نامہ قدس کو موصول ہونے والی اطلاعات کے مطابق فلسطینی وزارت اطلاعات کی طرف سے جاری کردہ ایک رپورٹ میں بتایا گیا ہے کہ اسرائیلی ریاست نے 19 فلسطینیوں کو ماورائے قانون حراست میں لے رکھا ہے۔
رپورٹ میں کہا گیا ہے کہ فلسطینی صحافیوں کی گرفتاری اور انہیں جیلوں میں ڈالے جانا بین الاقوامی قوانین اور انسانی حقوق کی سنگین پامالی ہے۔
رپورٹ میں کہا گیا ہے کہ اسرائیلی حکام فلسطینی صحافیوں کو دباؤ میں لانے کے لیے فوجی عدالتوں میں ان کے خلاف مقدمات قائم کر رہے ہیں۔ کئی فلسطینی اسیر صحافی کئی امراض کا شکار ہیں اور انہیں کسی قسم کی طبی سہولت فراہم نہیں کی گئی۔
فلسطینی وزارت اطلاعات نے فلسطینی صحافیوں اور ابلاغی کارکنوں کی گرفتاریوں کو تحریک آزادی کے لیے آواز بلند کرنے پر پابندی کے مترادف قرار دیا ہے۔
خیال رہے کہ اسرائیلی زندانوں میں قید فلسطینیوں کی تعداد 6500 ہے۔ ان میں سے بعض بچے، خواتین، فلسطینی ارکان پارلیمنٹ اور مریض شہری شامل ہیں۔