رام اللہ (روز نامہ قدس ۔آن لائن خبر رساں ادارہ) مقبوضہ مغربی کنارے کے وسطی شہر رام اللہ کی المغیر کالونی میں صیہونی آباد کاروں نے اسرائیلی فوج اورپولیس کی معاونت سے نہتے فلسطینیوں پر گولیاں برسائیں جس کے نتیجے میں ایک فلسطینی شہید اور 20 زخمی ہوگئے۔
روز نامہ قدس کو موصول ہونے والی اطلاعات کے مطابق ہلال احمر فلسطین اور وزارت صحت کی رپورٹ میں بتایا گیا ہے کہ صیہونی آباد کاروں کے حملوں میں 38 سالہ حمدی طالب سعادہ نعسان شہید اور کم سے کم 20 افراد زخمی ہوگئے۔
وزارت صحت کے مطابق صیہونی آباد کاروں کی طرف سے فلسطینی شہریوں پر براہ راست فائرنگ کی گئی جس کے نتیجے میں فلسطین پانچ فلسطینی شدید زخمی ہوگئے۔ زخمیوں کو رام اللہ کے مختلف اسپتالوں میں منتقل کیا گیا ہے۔
ہلال احمر کے مطابق صیہونی اشرار نے فلسطینی قصبے المغیرپرحملہ کیا جس کے نتیجے میں درجنوں افراد زخمی ہوئے ہیں۔
عینی شاہدین کے مطابق مسلح صیہونی شر پسندوں نے المغیر کے شمالی سمت سے فلسطینیوں کے گھروں پر اندھا دھند فائرنگ کی شروع کی جس کے نتیجے میں شہری اپنے گھروں کے اندر گولیاں لگنے سے زخمی ہوئے۔
المغیرقصبے کے میئر امین انو علیا نے کہا کہ صیہونی آباد کاروں نے قصبے کے اطراف سے فلسطینی شہریوں پر اندھا دھند فائرنگ شروع کردی جس کے نتیجے میں متعدد افراد زخمی ہوگئے۔