اسرائیلی فوج نے مغربی کنارے میں فلسطینی شہریوں پر حملوں کا سلسلہ جاری رکھتے ہوئے ضلع جنین اور جنین کیمپ میں ڈاکٹر خلیل سلیمان ہسپتال پر دھاوا بول کر متعدد افراد کو تشدد کا نشانہ بنایا۔
اسرائیلی فوج نے فلسطینیوں پر حملہ کیا اور اس دوران مزاحمت کرنے والوں پر صوتی بموں، فائرنگ اور اشک آور گیس کے شیلوں کی بوچھاڑ کردی۔
عینی شاہدین نے بتایا کہ اسرائیلی فوج کے پیدل یونٹ کے اہلکاروں اور مختلف فوجی گاڑیوں پر سوار فوجیوں کی بڑی تعداد نے جنین شہر کے علاقے السعادہ پر دھاوا بولا اور ڈاکٹر خلیل سلیمان ہسپتال جا کر فائرنگ شروع کردی۔
ادھر القدس یونیورسٹی کے جنوبی علاقے اور یونیورسٹی احاطے میں بھی صہیونی فوجی اہلکاروں کی بڑی تعداد دھاوا بولا کر بڑے پیمانے پر توڑ پھوڑ کی ہے۔
دوسری جانب ہیومن رائٹس کمیشن کا کہنا ہے کہ اسرائیلی فوج نے بدھ کے روز نابلس شہر کی مختلف کالونیوں میں چھاپہ مار کارروائیاں کر کے پانچ فلسطینی نوجوانوں کو حراست میں لے لیا ہے۔
عالمی تنظیم کے تحقیق کار احمد بیتاوی نے بتایا کہ اسرائیلی فوج نے شہر کے مغربی علاقوں اور العین کیمپ پر حملے کرکے رمزی عفوری، زاھی نعیم شبارو، فتح اللہ علاء الدین، ھادی دراوشہ اور احمد خباص کواغوا کرلیا ہے۔
بیتاوی نے بتایا کہ پانچوں نوجوانوں کو ان کے گھروں سے گرفتار کیا گیا ہے۔ ان سب کو بتاح تکفا، اور مجدو جیل کے تفتیشی مراکز منتقل کر دیا گیا ہے۔