(روز نامہ قدس ۔آنلائن خبر رساں ادارہ) غزہ میں جنگ بندی کا آج مسلسل 22واں دن ہے، جبکہ مزاحمت نے تین صیہونی قیدیوں کو پانچویں قسط کے تحت قیدیوں کے تبادلے کے معاہدے میں رہا کردیا ہے۔ اس کے بدلے میں غیر قانونی صیہونی ریاست اسرائیل نے 183 فلسطینی قیدیوں کو رہا کیا، جن میں بڑی تعداد عمر قید اور طویل سزائیں پانے والوں کی ہے۔
اسی دوران، صیہونی میڈیا نے رپورٹ کیا ہے کہ "فوجی دستے” نیتزاریم محور سے مکمل طور پر پیچھے ہٹ گئے ہیں، جو کہ جنگ بندی کے معاہدے کے تحت طے پایا تھا۔ معاہدے کے مطابق، پانچویں قسط کے نفاذ کے ساتھ ہی انہیں اس علاقے سے نکلنا تھا، تاہم قابض فوج نے اس کی باضابطہ تصدیق نہیں کی۔
جمعہ کے روز قابض فوج نے اعلان کیا کہ اس نے جنگ بندی معاہدے کی شرائط کے تحت غزہ میں تین فوجی ڈویژنز کو "دفاعی انداز” میں دوبارہ تعینات کر دیا ہے۔ ان میں 162 ویں، 143 ویں اور جنوبی کمانڈ کی 99 ویں ڈویژن شامل ہیں۔