جمعہ کو نابلس میں صیہونی آباد کاروں کی تاریخی مقامات کی بے حرمتی

نابلس (روز نامہ قدس ۔آن لائن خبر رساں ادارہ) اسرائیلی حکام کی فول پروف سیکیورٹی میں سیکڑوں صیہونی آباد کاروں نے غرب اردن کے شمالی شہر نابلس میں تاریخی اور مذہبی مقامات پر دھاؤے بولے۔ اس موقع پر صیہونی آباد کاروں نے تلمودی تعلیمات کے مطابق مذہبی رسومات ادا کیں۔

روز نامہ قدس کو موصول ہونے والی اطلاعات کے مطابق صیہونی آباد کاروں کو بسوں کے ذریعے مغربی نابلس میں ’’عورتا‘‘ کے مقام پر لایا گیا جہاں انہوں نے مقدس مقام کی بے حرمتی کی۔ اس موقع پر صیہونی آباد کاروں کو فوج اور پولیس کی طرف سے فول پروف سیکیورٹی مہیا کر رکھی تھی۔

عبرانی ٹی وی چینل 7 کے مطابق 450 صیہونی آباد کاروں نے عورتا قصبے میں ’’الیعازر بن ھارون‘‘ کے مقام پر دھاؤے بولے اور فول پروف سیکیورٹی میں مذہبی رسومات ادا کیں۔

خیال رہے کہ عورتا قصبے میں 12 تاریخی اور مذہبی مقامات ہیں جن پر آئے روز صیہونی آباد کار بے حرمتی کرتے ہیں۔ فلسطینی شہریوں نے صیہونیوں کے دھاوؤں کو اشتعال انگیزی قرار دیا ہے۔