امریکی وزیرخارجہ جان کیری کے فلسطینی اتھارٹی کے ہیڈ کواٹر رام اللہ آمد پر مغربی کنارے کے مختلف شہروں میں احتجاجی مظاہرے اور جلوس نکالے گئے جن میں جان کیری کی آمد کے خلاف سخت احتجاج کیا گیا۔
رپورٹ کے مطابق امریکی وزیرخارجہ کی رام اللہ آمد پرفلسطینی اتھارٹی کے ہیڈ کواٹر کے باہر ایک مظاہرہ کیا گیا جس میں ہزاروں شہریوں نے شرکت کی۔ مظاہرین نے جان کیری کی آمد کے خلاف فلک شگاف نعرے بازی کی۔ مظاہرین نے جان کیری کی جانب سے اس بیان کی شدید مذمت کی جس میں انہوں ںے یہودیوں پر چاقوں سے حملوں کو "دہشت گردی” قرار دیا تھا۔مظاہرین نے ہاتھوں میں بینرز اور کتبے اٹھا رکھے تھے جن پر امریکی حکومت کی اسرائیل نوازی کے خلاف مذمتی نعرے درج تھے۔ مظاہرین نے امریکی وزیرخارجہ کے فلسطین سے فوری طورپر نکل جانے کا مطالبہ کیا اور کہا کہ صہیونیوں کے ہاتھ مظلوم فلسطینیوں کے خون سے رنگین ہیں مگر جان کیری کو اسرائیلی مظالم نہیں بلکہ فلسطینیوں کی تحریک ہی دکھائی دیتی ہے۔
خیال رہے کہ امریکی وزیرخارجہ جان کیری نے گذشتہ روز رام اللہ میں فلسطینی اتھارٹی کےسربراہ محمود عباس سے ملاقات کی۔ قبل ازیں انہوں نے تل ابیب میں اسرائیلی صدر سے ملاقات کے بعد ایک پریس کانفرنس کے دوران کہا تھا کہ یہودیوں پر فلسطینیوں کے چاقو سے حملے "دہشت گردی” ہیں۔ ان کے اس بیان پر فلسطین کے سیاسی اور عوامی حلقوں میں شدید رد عمل سامنے آیا ہے۔