یہودی آباد کاروں نے اتوار کے روز مغربی کنارے کے جنوبی شہر بیت لحم کی مختلف مساجد کی دیواروں پر فلسطینیوں سے انتقام پر مبنی اشتعال انگیز عبارتیں لکھ دیں۔ تقوع کی یہودی بستی کے آباد کاروں نے مختلف مساجد پر دھمکی آمیز عبارتیں لکھ دی ہیں۔
مساجد کی دیواروں پر ستارہ داودی بنایا گیا ہے اور فلسطینی شہریوں کی املاک پر حملوں کی دھمکی بھی دی گئی ہے۔ ذرائع نے بتایا کہ علاقے کے مکینوں نے پیر کی علی الصبح مسجد کی دیواروں پر ان عبارتوں کو دیکھا جن میں فلسطینی نوجوانوں کو مسجد بلال بن رباح اورمسجد صلاح الدین ایوبی میں داخل ہونے سے روکنے کی دھمکی بھی دی گئی۔
دوسری جانب یہودی آباد کاروں کے ایک جتھے نے فلسطینی گاڑیوں پر بھی حملہ کیا ہے۔ فلسطینی ذرائع کے مطابق انتہاء پسند یہودیوں نے تین روز قبل فلسطینی مزدوروں کے یہودی بستی ’’تقوع‘‘ میں داخل ہونے کی صورت میں حملوں کی دھمکی بھی دی تھی۔
بشکریہ:مرکز اطلاعات فلسطین