مقبوضہ بیت المقدس (روز نامہ قدس ۔آن لائن خبر رساں ادارہ) اسرائیلی فوج نے دعویٰ کیا ہے کہ اس نے ہفتے کے روز مقبوضہ مغربی کنارے کے وسطی شہر رام اللہ سے ایک فلسطینی لڑکی کو حراست میں لیا ہے جس پر دو روز قبل مقبوضہ بیت المقدس میں ایک صیہونی آباد کار کے قتل میں ملوث ہونے کا شبہ ہے۔
روز نامہ قدس کو موصول ہونے والی اطلاعات کے مطابق اسرائیلی فوج کی طرف سے جاری کردہ ایک بیان میں کہا گیا ہے کہ فوج نے ایک خفیہ کارروائی میں 19 سالہ ایک لڑکی کو حراست میں لیا ہے جس نے مبینہ طورپر دو روز قبل القدس میں ’’اوری انسباخر‘‘ کالونی میں ایک صیہونی خاتون کو چاقو کے وار کرکے قتل کردیا تھا۔
عسکری ذرائع کا کہنا ہے کہ فلسطینی لڑکی نے قومی بنیادوں پر ایک صیہونی خاتون کو قتل کیا ہے۔
دو روز قبل صیہونی خاتون کو جبال القدس میں درختوں کے درمیان سے مردہ پایا گیا تھا۔ اس پر چاقو کے وار کیے گئے تھے۔ اسرائیلی پولیس نے خاتون کے قتل کے حوالے سے فوری تحقیقات شروع کردی تھیں۔