اسرائیلی جیلوں میں زیرحراست ہزاروں بھوک ہڑتالی فلسطینی اسیران سے اظہار یکجہتی کے لیے فلسطینیوں کا احتجاج پورے فلسطین میں جاری ہے۔ مغربی کنارے اورغزہ کی پٹی میں احتجاجی مظاہروں کے علاوہ مقبوضہ بیت المقدس کے شہریوں نے مسجد اقصیٰ میں بھوک ہڑتالی قیدیوں کے حق میں دھرنا دیا۔
مرکزاطلاعات فلسطین کے مطابق جمعہ کے روز نماز جمعہ کے بعد ہزاروں افراد نے اپنے اسیر پیاروں کی تصاویراٹھا کر مسجد اقصیٰ کے باہر صہیونی مظالم کےخلاف دھرنے میں شرکت کی۔
مسجد اقصیٰ میں قبۃ الصخرۃ کے مقام پر جمع مظاہرین نے ہاتھوں میں پلے کارڈ اور بینرزاٹھا رکھے تھے جن پر جیلوں میں زیرحراست تمام اسیران کی فوری رہائی کے مطالبات درج تھے۔
اس موقع پر مظاہرین نے عرب ممالک اور مسلم امہ کی توجہ بھی فلسطینی اسیران کے مسائل کی جانب متوجہ کرائی اور مطالبہ کیا کہ اسرائیلی عقوبت خانوں میں یہودیوں کے مظالم کے شکار آٹھ ہزار فلسطینیوں کو مظالم سے نجات دلائی جائے۔
اس موقع پر مقامی نمائندہ شخصیات نے فلسطینی انتظامیہ پر بھی زوردیا کہ وہ قیدیوں پر ڈھائے جانے والے مظالم کو دنیا کے سامنے بے نقاب کرنے کے لیے تمام عالمی فورمز پر اس ایشو کو اٹھائے۔