مقبوضہ بیت المقدس (روز نامہ قدس ۔آن لائن خبر رساں ادارہ) اسرائیلی سپریم کورٹ نے بزرگ فلسطینی رہنما اور اسلامی تحریک کے امیر الشیخ رائد صلاح پر عائد کی گئی پابندیوں میں تین ماہ کی توسیع کردی ہے۔
روز نامہ قدس کو موصول ہونے والی اطلاعات کے مطابق الشیخ رائد صلاح کے وکیل خالد زبارقہ نے ایک بیان میں بتایا کہ ان کے موکل پر عائد کی گئی اسرائیلی پابندیوں میں مزید تین ماہ کی توسیع کردی گئی ہے۔ انہیں اسرائیلی فوج کی سفارش سے گھر پرنظر بند رکھنے، تقاریر کرنے، جمعہ کا خطبہ دینے، سوشل میڈیا کا استعمال کرنے اور ذرائع ابلاغ سے رابطہ کرنے پر پابندی عائد کی گئی ہے۔
خالد زبارقہ نے الشیخ رائد صلاح پرعائد کی جانے والی پابندیوں کو غیرقانونی اور غیرانسانی قرار دیا اور کہا الشیخ رائد صلاح پر پابندیاں انہیں عوام کے قریب جانے سے روکنے مذموم کوشش ہے۔
خیال رہے کہ سنہ 1948ء کے مقبوضہ فلسطینی علاقوں سے تعلق رکھنے والے بزرگ فلسطینی رہنما الشیخ رائد صلاح کے خلاف اسرائیلی فوج اور پولیس نے کئی نام نہاد الزامات کے تحت پابندیاں عائد کررکھی ہیں۔ گذشتہ برس انہیں جیل سے مشروط رہائی کے بعد ان کے گھر پرنظر بند کردیا گیا تھا مگر وہ اپنے اہل خانہ کے سوا کسی اور شہری یا ذرائع ابلاغ سے رابطہ نہیں کرسکتے۔