اسرائیل (مقبوضہ فلسطینی علاقوں) میں کام کرنے والی انسانی حق کی ایک تنظیم نے انکشاف کیا ہے کہ گذشتہ دو ماہ سے مسلسل بھوک ہڑتال کرنے والے دو فلسطینی اسیران ثائر حلاحلہ اور بلال دیاب نہایت تشویشناک حالت میں اسپتال میں زیرعلاج ہیں۔
ان کے زندہ بچ جانے کے امکانات کم سے کم ہوتے جا رہے ہیں۔ انسانی حقوق کی تنظیم نے فلسطینی اسیران کے مطالبات کو دانستہ طورپر نظر انداز کرنے پراسرائیلی حکومت کو کڑی تنقید کا نشانہ بنایا۔
مرکزاطلاعات فلسطین کے مطابق "اطباء برائے انسانی حقوق آرگنا ئزیشن” کی جانب سے جاری ایک تازہ بیان میں کہا گیا ہے کہ اسرائیل نے دو فلسطینی اسیران کی بھوک ہڑتال کو نظرانداز کیا تو اس کے رد عمل میں ایک ہزار فلسطینیوں نے بھوک ہڑتال شروع کردی۔ ایسے لگ رہا ہے کہ صہیونی حکومت دانستہ طورپر فلسطینی بھوک ہڑتالی اسیران کے جائز مطالبات کو بھی مسترد کررہا ہے۔
بیان میں کہا گیا کہ دیاب اور حلاحلہ کی زندگیاں اس لیے خطرے سے دو چار ہوچکی ہیں کیونکہ وہ گذشتہ باسٹھ ایام سے مسلسل بھوک ہڑتال پر ہیں۔ صحت بگڑنے کے بعد انہیں اسپتالوں میں لے جایا گیا ہے جہاں انہیں غیر فطری طریقے سے خوراک فراہم کرنے کی کوشش کی جاتی ہے تاہم اسیران نے خوراک لینے سے مکمل انکارکردیا ہے۔
انسانی حقوق کی تنظیم نے بھوک ہڑتالی اسیران کے ساتھ برتے جانے والے سلوک کے بارے میں کہا کہ انہیں بیمار بھوک ہڑتالی اسیران کو طبی معاونت کی فراہمی پر بھی اطمینان نہیں کیونکہ اسرائیلی ڈاکٹرز اور ان کا دیگر طبی عملہ فلسطینی اسیران کے مسائل میں ہمیشہ کوتاہی اور مبینہ غفلت کا مرتکب رہا ہے۔
خیال رہے کہ فلسطینی اسیران ستائیس سالہ ابو دیاب اور چونتیس سالہ حلاحلہ نے انتیس فروری کو بھوک ہڑتال شروع کی تھی جو اب تیسرے ماہ میں داخل ہوگئی ہے۔ طویل بھوک ہڑتال کے باعث دونوں قیدیوں کی حالت نہایت خطرےمیں بیان کی جاتی ہے۔