الخلیل (روز نامہ قدس ۔آن لائن خبر رساں ادارہ) انسانی حقوق کی عالمی تنظیم ایمنسٹی انٹرنیشنل نے فلسطینی اتھارٹی سے مطالبہ کیا ہے کہ وہ زیرحراست فلسطینی صحافی عیسیٰ عمرو کا ٹرائل بند کرے اور اسے فوری طور پررہا کرے۔
روز نامہ قدس کو موصول ہونے والی اطلاعات کے مطابق ایمنسٹی انٹرنیشنل کی طرف سے جاری کردہ ایک بیان میں کہا گیا ہے کہ فلسطینی اتھارٹی نے صحافی اور سماجی کارکن عیسیٰ عمرو کو غیرقانونی طورپر حراست میں لے رکھا ہے۔ بیان میں صحافی کی گرفتاری کو فلسطین میں آزادی اظہار رائے پر حملہ قرار دیا ہے۔
ایمنسٹی انٹرنیشنل کے مطابق عیسیٰ عمرو کو حراست میں رکھنا اور ان کا ٹرائل انسانی حقوق کی سنگین خلاف ورزی ہے۔
بیان میں فلسطینی اتھارٹی سے مطالبہ کیا گیا ہے کہ وہ صحافی عیسیٰ عمرو کے خلاف عائد کردہ تمام الزامات اور مقدمات ختم کرتے ہوئے انہیں فوری طور پررہا کرے۔
خیال رہے کہ فلسطینی اتھارٹی نے صحافی عیسیٰ عمرو کو 4 ستمبر 2017ء کوحراست میں لیا۔ وہ ’’یوتھ برائے انسداد صیہونی آبادکاری‘‘ کے چیئرمین ہیں اور سوشل میڈیا پرفلسطین میں صیہونی آباد کاری کی روک تھام میں پیش پیش رہے ہیں۔
فلسطینی اتھارٹی کی جانب سے اسیر صحافی عیسیٰ عمرو پر 18 مختلف الزامات عائد کیا گیا ہے۔