اسلام کے عالمی اتحاد کی القدس کمیٹی کے رکن ڈاکٹر صلاح سلطان فیڈریشن آف عرب ڈاکٹرز کی القدس کمیٹی کے سربراہ جمال عبد السلام کے تعاون سے مقبوضہ بیت المقدس کو یہودی رنگ رنگنے کے اسرائیلی اقدامات کے خلاف اکیسنومبر کو قاھرہ میں ملین مارچ کا اعلان کیا ہے۔
گزشتہ روز فیڈریشن آف عرب ڈاکٹرز کی القدس کمیٹی کےسربراہ جمال عبد السلام کی سربراہی میں ایک ایگزیکٹو کمیٹی تشکیل دینے کا اعلان کیا گیا تھا۔ اس کمیٹی نے قبلہ اول مسجد اقصی کو یہودیانے کی صہیونی ریشہ دوانیوں کےخلاف اقدامات کا آغاز کرتے ہوئے مصری دارالحکومت قاھرہ میں احتجاجی ریلی کا اعلان کیا ہے۔
ڈاکٹر صلاح سلطان نے واضح کیا کہ اس ریلی میں انہیں الازھر یونیورسٹی کے شیخ ڈاکٹر احمد الطیب، علمائے اسلام کے عالمی اتحاد کے سربراہ شیخ یوسف قرضاوی کا تعاون بھی حاصل ہے۔ انہوں نے بتایا کہ اس ریلی میں سابق مفتی اعظم مصر شیخ نصر فرید سمیت جید علماء کرام شرکت کرینگے۔
’’مرکز اطلاعات فلسطین‘‘ سے خصوصی گفتگو کرتے ہوئے صلاح سلطان کا کہنا تھا کہ اس ملین مارچ میں شرکت کے لیے مختلف سیاسی حلقوں سے بات چیت جاری ہیں۔ ریلی العباسیہ کالونی کی مسجد النور سے تحریر اسکوائر میں عرب لیگ کے ہیڈ کوارٹر تک جائے گی۔
انہوں نے بتایا کہ پہلے اس ملین مارچ کا پروگرام پچیس نومبر بروز جمعہ کو رکھا گیا تھا تاہم اٹھائیس نومبر کو قومی کونسل کے انتخابات کے پیش نظر سیاسی حلقوں کی مشاورت سے تاریخ تبدیل کر دی گئی، مسجد اقصی کے تحفظ کی یہ تاریخی ریلی اب اکیس نومبر کو نکالی جائے گی۔
انہوں نے بتایا کہ اس ریلی سے شیخ الازھر، شیخ قرضاوی اور مصری وزیر اعظم سمیت متعدد معروف شخصیات مقبوضہ بیت المقدس اور مسلمانوں کے دیگر مقدس مقامات کے خلاف جاری صہیونی مہم کی مذمت میں خطابات کریں گی۔ ان کا کہنا تھا کہ فلسطین کی آزادی کے لیے جاری جہاد میں اب کسی کے لیے گھر بیٹھے رہنے کی گنجائش باقی نہیں رہی۔ قوم کے ہر فرد کو اپنے تیسرے مقدس ترین مقام کی آزادی کے لیے گھروں سے باہر آنا ہو گا۔