مقبوضہ بیت المقدس (روز نامہ قدس ۔آن لائن خبر رساں ادارہ) اسرائیلی فوج نے فلسطین کے مقبوضہ مشرقی المقدس میں الزعیم چوکی سے ایک فلسطینی لڑکی کو حراست میں لے لیا جس پر صیہونی آباد کار کو چاقو کے حملے میں زخمی کرنے کا الزام عائد کیا گیا ہے۔
روز نامہ قدس کو موصول ہونے والی اطلاعات کے مطابق اسرائیلی فوج کی طرف سے جاری ایک بیان میں کہا گیا ہے کہ گرفتار کی گئی فلسطینی لڑکی کے قبضے سے ایک چاقو برآمد ہوا ہے۔ گرفتاری سے قبل اس پر ہوائی فائرنگ کی گئی جس کے بعد اسے حراست میں لے لیا گیا۔
عینی شاہدین کا کہنا ہے کہ اسرائیلی فوج نے راہ چلتے ایک فلسطینی لڑکی کو تشدد کا نشانہ بنایا اور اس کے بعد اسے حراست میں لے لیا گیا۔
سماجی کارکنوں نے سوشل میڈیا پر ایک فوٹیج پوسٹ کی ہے جس میں فلسطینی لڑکی کی گرفتاری کا منظر دکھایا گیا ہے۔ فوٹیج میں دیکھا جاسکتا ہےکہ اسرائیلی فوجی فلسطینی لڑکی کو زمین پر گراتے ہیں اور اس کے بعد اسے تشدد کا نشانہ بناتے اور گرفتار کر لیتے ہیں۔