یوم الارض کے موقع پر قابض اسرائیلی فوج نے الخلیل کے دو دیہات میں ہونے والی پرامن ریلیوں کو بزور روکنے کی کوشش کی جس کے نتیجے میں متعدد فلسطینی شہری زخمی ہو گئے۔
الخلیل کے شمال میں واقع بیت امر گاوں کے ایک انسانی حقوق کے کارکن یوسف ابو ماریا نے مرکز اطلاعات فلسطین کو بتایا کہ بہت سے شہریوں کو سانس لینے میں دشواری کا سامنا کرنا پڑا جبکہ کچھ کو چوٹیں بھی آئی تھیں۔
انہوں نے کہا کہ قابض فوجیوں نے جلوس پر آنسو گیس کے شیل اور گولیاں چلائیں اور شرکاء پر لاٹھی چارج بھی کیا۔ ابو ماریا کے مطابق فوجیوں نے صحافی عبد الھشلمون کو حراست میں لے لیا جبکہ کارکنوں کی ایک تعداد زخمی ہوگئی تھی۔
عینی شاہدین نے مرکز اطلاعات فلسطین کو بتایا کہ قابض اسرائیلی فوج نے یطہ گائوں میں منعقد ہونے والے ایک اور مارچ کو روکا جس میں یوم الارض کو منایا جا رہا تھا اور اسرائیلی حکام کی آبادکاری پالیسی کے خلاف احتجاج کیا جا رہا تھا۔
انہوں نے بتایا کہ قابض فوجیوں کی ایک بڑی تعداد نے مارچ کے شرکا کو گھیرے میں لے لیا۔ مارچ کے شرکاء نے قابض حکام کی فلسطینی کسانوں اور زمینوں کے مالکوں کے خلاف نسلی عصبیت کی پالیسیوں اور آبادکاری کی مہم کے خلاف پوسٹرز اور بینر اٹھا رکھے تھے۔
بشکریہ:مرکز اطلاعات فلسطین