اسرائیلی سکیورٹی فورسز نے مغربی کنارے کے سب سے بڑے شہر الخلیل میں سکول کے طلبہ کی پکڑ دھکڑ مہم شروع کردی ہے، شہر کی اولڈ میونسپلٹی کے اسکولوں کے پچاس سے زائد طلبہ کو حراست میں لے لیا گیا۔
مقامی ذرائع اور عینی شاہدین نے ’’مرکز اطلاعات فلسطین‘‘ کو بتایا کہ اسرائیلی فوجی اہلکاروں نے مختلف اسکولوں کی جانب جانے والی مرکزی شاہراہ پر اچانک ایک چیک پوسٹ قائم کی اور اسکولوں کو جانے والے طلبہ کو پکڑنا شروع کردیا۔ طارق بن زیاد اسکول، الخلیل پرائمری اسکول اور اقوام متحدہ کے زیر انتظام چلنے والی ایجنسی کے اسکولوں کے طلبہ کو گرفتار کیا گیا۔ پکڑے گئے طلبہ میں ابتدائی اور ثانوی کلاسوں کے طلبہ شامل ہیں۔
عینی شاہدین نے بتایا کہ گرفتار کیے گئے طلبہ کو قریبی فوجی اڈے کی جانب منتقل کردیا گیا ہے جہاں سے تاحال کسی کی رہائی ممکن نہ ہوسکی ہے۔ اتنی بڑی تعداد میں تعلیم کے حصول کے لیے جانے والے ان طلبہ کی گرفتاری پر شہر بھر میں غم و غصے کی لہر دوڑ گئی ہے۔
بشکریہ:مرکز اطلاعات فلسطین