(روزنامہ قدس ۔آن لائن خبر رساں ادارہ) ترک صدرکا کہنا ہے کہ اسرائیل اقوام متحدہ کی قراردادوں پر عمل پیرا نہیں تو یواین نے کیا کردار ادا کیا؟ یرشیلم میں دارالحکومت منتقل کرنا اور فلسطینیوں کے خلاف اسرائیلی اقدامات اقوام عالم کے منہ پر طمانچے کے مترادف ہے۔
نیویارک میں اقوام متحدہ کی جنرل اسمبلی سے خطاب کرتے ہوئے ترک صدر رجب طیب اردگان نے فلسطین کا نقشہ دکھاتے ہوئے بتایا کہ تقریباً سارے ملک فلسطین پر قبضہ کرنے کے باوجود اسرائیل کا لالچ ابھی تک ختم نہیں ہوا، وہ بقیہ علاقے کو بھی لوٹنا چاہتا ہے۔
ترک صدر کا مزید کہنا تھا کہ ’’اگر ظلم اور انصافی پر سب خاموش بیٹھے رہے تو یاد رکھیں کہ ہم پھر بھی خاموش نہیں بیٹھیں گے، دنیا بھر میں ہونے والے مظالم کی نہ صرف مذمت کی بلکہ مظلوم کا ساتھ دینے کا سلسلہ بھی جاری رکھیں گے، فلسطین ، کشمیر، شام کا ناقابل بیان درد ہے جسے سننا ضروری ہے، ہر طرح کے حالات میں ہم سب کو اُن کا ساتھ دینا ہوگا‘‘۔