مقبوضہ بیت المقدس (روز نامہ قدس ۔آن لائن خبر رساں ادارہ) فلسطین کے مقبوضہ بیت المقدس شہر میں اسرائیلی فوج کی طرف سے کی گئی کھدائیوں کے نتیجے میں سلوان کے مقام پر ایک گرجا گھر کی دیوار گر گئی۔
روز نامہ قدس کو موصول ہونے والی اطلاعات کے مطابق مقامی شہریوں نے بتایا کہ سلوان میں جامع مسجد العین کے عقب میں واقع ایک گرجا گھر کی دیوار کا کچھ حصہ زمین بوس ہوگیا۔
سلوان میں دفاع اراضی کمیٹی کے ترجمان فخری ابو دیاب نے نامہ نگار کو بتایا کہ بارش نے مسجد العین کے عقب میں واقع ایک گرجا گھر کی دیوار کے اس حصے کو نمایاں کر دیا جو اسرائیلی فوج کی کھدائیوں کی وجہ سے گر چکا ہے۔
انہوں نے کہا کہ سلوان میں کئی ایسے مقامات موجود ہیں جواسرائیلی فوج کی طرف سے کی گئی کھدائیوں کی وجہ سے خطرے کی زد میں ہیں۔
انہوں نے کہا کہ بیت المقدس میں بہت سی فلسطینی املاک، چٹانیں اور عمارتیں اب ہوا میں معلق ہیں جو کسی بھی وقت زمین بوس ہوسکتی ہیں۔
فخری ابو دیاب نے بیت المقدس میں اسرائیلی حکام کی طرف سے کی گئی کھدائیوں کا سلسلہ روکنے اور فلسطینی املاک کو تحفظ فراہم کرنے کے لیے عالمی برادری کی مداخلت پر زور دیا۔