رام اللہ (روز نامہ قدس ۔آن لائن خبر رساں ادارہ) فلسطین میں اسیران اسٹڈی سینٹر کی طرف سے جاری کردہ ایک رپورٹ میں بتایا گیا ہے کہ 2018ء کے دوران اسرائیلی فوج نے جہاں بڑی عمرکے فلسطینیوں کو حراست میں لیا وہیں کم عمر بچوں کی بھی ایک بڑی تعداد گرفتار کی گئی۔
روز نامہ قدس کو موصول ہونے والی اطلاعات کے مطابق اسرائیلی فوج نے سال دو ہزار اٹھارہ کے دوران 980 فلسطینی بچوں کو حراست میں لے جیلوں میں ڈالا اور انہیں قید اور بھاری جرمانوں کی سزائیں دی گئیں۔ گرفتار ہونے والے بچوں میں کئی بیمار اور زخمی تھے۔
اسیران اسٹڈی سینٹر کے ترجمان ریاض الاشقر نے بتایا کہ اسرائیلی فوج ایک طے شدہ منصوبے کے تحت فلسطینیوں کی نئی نسل کو حراست میں لے رہی ہے۔ بچوں کی گرفتاری کا مقصد فلسطینیوں کی نئی نسل کو آزادی کی تحریک میں حصہ لینے سے روکنے کے لیے ان کے خلاف طاقت کا استعمال کرنا ہے۔ گذشتہ برس بعض ایسے بچوں کو بھی جنگی مجرم قرار دے کر گرفتار کیا گیا جن کی عمریں 12 سال سے بھی کم تھیں جب کہ زید طہ نامی ایک بچے کو الخلیل سے حراست میں لیا گیا۔ اس کی عمر9 سال بتائی جاتی ہے۔
ریاض الاشقر کا کہنا تھا کہ گذشتہ برس حراست میں لیے گئے بچوں میں سے 250 اب بھی اسرائیلی جیلوں میں پابند سلاسل ہیں۔ دوران حراست اسرائیلی جلاد کم سن فلسطینیوں کو انسانیت سوز تشدد کا نشانہ بنا رہے ہیں اور عالمی سطح پران کے بنیادی حقوق اور قوانین کی کھلے عام پامالی کی جاتی ہے۔ اسرائیلی جیلوں میں قید فلسطینی بچوں میں 55 مختلف بیماریوں کا شکار ہیں یا زخمی حالت میں گرفتار کرنے کے بعد لا علاج ہیں۔
رپورٹ میں بتایا گیا ہے کہ 2018ء کے دوران اسرائیلی فوج نے فلسطینی بچوں کو 9 لاکھ 97 ہزار شیکل جرمانے کیے۔ امریکی کرنسی میں یہ رقم 2 لاکھ 70 ہزار بتائی جاتی ہے۔
فلسطینی بچوں کے خلاف اسرائیلی ریاست کے مکروہ حربوں میں ایک حربہ انہیں طویل قید کی سزائیں دینے کا بھی شامل ہے۔ گذشتہ برس قابض اسرائیلی ریاست کی ایک فوجی عدالت نے 16 سالہ فلسطینی ایھم باسم صباح کو 35 سال قید اور ایک ملین شیکل جرمانہ کی سزا سنائی۔ ایھم صباح کو دو سال قبل گرفتار کیا گیا تھا۔ اس وقت اس کی عمر 14 سال تھی۔ 12 فلسطینی بچوں کو سوشل میڈیا پر اسرائیل کے خلاف اشتعال انگیز مواد پوسٹ کرنے کے الزام میں گرفتار کیا گیا۔ حراست میں لینے کے بعد 95 فلسطینی بچوں کو گھروں پر نظر بندی کی سزائیں دی گئیں۔