مقبوضہ مغربی کنارا (روز نامہ قدس ۔آن لائن خبر رساں ادارہ) فلسطین کے مقبوضہ مغربی کنارے اور القدس میں اسرائیلی فوج نے گھر گھر تلاشی کے دوران متعدد فلسطینی شہریوں کو حراست میں لے لیا۔ ادھر القدس میں فلسطینیوں کے ساتھ ہونے والے تصادم میں چار فلسطینی زخمی ہوگئے۔
روز نامہ قدس کو موصول ہونے والی اطلاعات کے مطابق اسرائیلی فوج نے شمال مغربی الخلیل میں بیت کاحل قصبے میں تلاشی کے دوران متعدد فلسطینیوں کو حراست میں لے لیا۔ اسرائیلی فوج نے یطا قصبے میں تلاشی کے دوران 21 سالہ حسن النجار کو حراست میں لے لیا۔
ادھرغرب اردن کے جنوبی شہر بیت لحم میں نحالین کے مقام پر گھروں میں گھر چھاپے مارے تاہم کسی شخص کی گرفتاری عمل میں نہیں لائی جاسکی۔
مشرقی بیت المقدس تقوع کے مقام پر اسرائیلی فوج نے چھاپہ مار کارروائی کے دوران دو فلسطینیوں کو حراست میں لینے کے بعد نامعلوم مقام پر منتقل کردیا۔ ان کی شناخت محمد مراد اور خلیل شعبان کے نام سے کی گئی ہے۔
ادھر مقبوضہ بیت المقدس میں شاہراہ العین پر اسرائیلی فوج نے تلاشی کے دوران سلوان کے مقام پر چار فلسطینیوں کو گولیاں مار کر زخمی کردیا۔
رپورٹ کے مطابق اسرائیلی فوج اور فلسطینیوں کے درمیان تصادم کے بعد اسرائیلی فوجیوںنے متعدد فلسطینیوں کو حراست میں لے لیا۔