مقبوضہ بیت المقدس (روز نامہ قدس ۔آن لائن خبر رساں ادارہ) فلسطین کے مقبوضہ بیت المقدس میں اسرائیلی فوج نے حرجیہ کے مقام سے ایک خاتون صیہونی آبادکار کی لاش قبضے میں لی ہے۔
روز نامہ قدس کو موصول ہونے والی اطلاعات کے مطابق اسرائیلی پولیس کا کہنا ہے کہ پولیس نے ایک خاتون کی لاش قبضے میں لینے کے بعد چار فلسطینیوں کو حراست میں لیا ہے جن پرخاتون کو قتل کرنے کا شبہ ہے۔
دوسری جانب عبرانی اخبار’’یدیعوت احرونوت‘‘ کی ویب سائیٹ نے عسکری ذرائع کے حوالے سے بتایا ہے کہ اسرائیلی پولیس نے ایک خاتون کی لاش قبضے میں لی ہے جس کی گردن سے چاقو سے وارکیے گئے ہیں۔ تاہم اس کے پاس سے کسی قسم کی دستاویزات نہیں ملیں جس کے باعث اس کی شناخت نہیں ہوسکی۔
قبل ازیں اسرائیلی ذرائع ابلاغ نے خبر دی تھی کہ پولیس نے ایک صیہونی آبادکار خاتون کے قتل کے شبے میں چار فلسطینیوں کو حراست میں لیا ہے تاہم اس کی مزید تفصیلات بیان نہیں کی گئیی۔
خبر رساں ادارے’’اناطولیہ‘‘ کے مطابق پولیس اور قانون نافذ کرنے والے دیگراداروں نے صیہونی آبادکار خاتون کی ہلاکت تحقیقات شروع کردی ہیں۔