رپورٹ کے مطابق اسرائیلی فوجیوں نے مقبوضہ مغربی کنارے کے شہر الخلیل کے دبوبا ٹاؤن کے قریب ایک فلسطینی نوجوان کو گولیاں ماردیں جس سے وہ موقع پر ہی شہید ہوگیا۔ صیہونی فوجیوں نے دعوی کیا ہے کہ مذکورہ فلسطینی نوجوان نے دبوبا ٹاؤن کے داخلے کے راستے پر ایک صہیونی فوجی اور ایک مشہور شخصیت کے بیٹے کو چاقو سے وار کرکے زخمی کردیا تھا۔
عینی شاہدین کے مطابق اس واقعے کے بعد صیہونی فوجیوں نے فلسطینیوں کے گھروں پر حملے کیے اور متعدد فلسطینیوں کو تشدد کا نشانہ بنایا۔
یکم اکتوبر سے مقبوضہ فلسطینی علاقوں میں جاری تحریک انتفاضہ قدس کے دوران شہید ہونے والے فلسطینیوں کی تعداد ایک سو اٹھارہ ہوگئی ہے۔
مسجد الاقصی پر صیہونی آباد کاروں کے حملوں کے بعد سے مقبوضہ بیت المقدس میں حالات بدستور کشیدہ چلے آرہے ہیں۔ مقبوضہ فلسطینی علاقوں میں جاری بدامنی کے دوران بیس صیہونی بھی ہلاک ہوئے ہیں۔