رام اللہ (روز نامہ قدس ۔آن لائن خبر رساں ادارہ) فلسطینی محکمہ امور اسیران نے اپنی رپورٹ میں بتایا ہے کہ گذشتہ روز اسرائیلی فوج کے جلادوں کی بڑی تعداد نے ریمون نامی عقوبت خانے میں گھس کر وارڈ 4 میں قید فلسطینی اسیران کو تشدد کا نشانہ بنایا۔
روز نامہ قدس کو موصول ہونے والی اطلاعات کے مطابق انسانی حقوق کے ادارے کے بیان میں بتایا ہے کہ اسرائیلی فوجی تفتیش اور تلاشی کی آڑ میں جیل میں جا گھسے اور انہوں نے قیدیوں کے کمروں میں موجود سامان تل پٹ کرکے رکھ دیا۔
اسرائیلی فوجیوں نے فلسطینی اسیران پر تشدد کیا۔ اسرائیلی فوج کے تشدد سے ایمن طبیش، منیف ابو عطوان اور عرفات الزیر نامی قیدی زخمی ہوگئے۔ بعد ازاں اسیر منیف ابو عطوان اور عرفات الزیر کو قید تنہائی میں ڈال دیا گیا۔