اسرائیلی عدالت سے اسلامی جہاد کے تین کارکنوں کو قید اور جرمانہ کی سزائیں

رام اللہ (روز نامہ قدس ۔آن لائن خبر رساں ادارہ) فلسطین میں انسانی حقوق کے اداروں کے مطابق اسرائیل کی ’’سالم‘‘ فوجی عدالت نے اسلامی جہاد کے زیرحراست تین کارکنوں کو قید اور جرمانہ کی سزائیں سنائی ہیں۔

روز نامہ قدس کو موصول ہونے والی اطلاعات کے مطابق شہداء و اسیران فاؤنڈیشن کی رپورٹ میں بتایا گیا ہے کہ 18 سالہ اسیر اسید محمود ناجی صالح کو 16 ماہ قید اور 4000 شیکل جرمانہ کی سزا سنائی گئی۔ اسے 28 جون 2018ء کو غرب اردن کے شمالی شہر طوباس سے حراست میں لیاگیا تھا۔

رپورٹ کے مطابق 21سالہ عبدالرحمان ذیاب محمود خلوف کو 15 ماہ قید اور 2000 شیکل جرمانہ کیا گیا۔ اسے چار ستمبر 2018ء کو جنین کے نواحی علاقے برقین سے حراست میں لیا گیا تھا۔

اسلامی جہاد کے تیسرے کارکن 26 سالہ محمد رفعت توفیق ربایعہ کو چھ ماہ قید اور 2000 شیکل جرمانہ کیا گیا۔ ان تینوں پر اسرائیل کے خلاف نفرت کو ہوا دینے کا الزام عائد کیا گیا ہے۔