غزہ (روز نامہ قدس ۔آن لائن خبر رساں ادارہ) اتوار اور پیر کی درمیانی شب صحرائے نقب کی جیل میں حماس تنظیم کے ایک قیدی نے چاقو سے حملہ کر کے دو اسرائیلی جیلروں کو زخمی کر دیا۔ زخمی جیلروں میں سے ایک کی حالت تشویش ناک ہے۔
روز نامہ قدس کو موصول ہونے والی اطلاعات کے مطابق بعد ازاں اسرائیلی اسپیشل فورسز کے یونٹوں نے جیل پر دھاوا بول دیا۔ کارروائی میں 16 فلسطینی قیدی زخمی ہو گئے جن میں 3 کی حالت نازک ہے۔
دوسری جانب فلسطینی پرزنر کلب نے حالیہ پیش رفت سے خبردار کرتے ہوئے قیدیوں پر حملے کے جرم کی تمام تر ذمے داری قابض اسرائیل کی جیل انتظامیہ پر عائد کی ہے۔
انسانی حقوق کے ذرائع کا کہنا ہے کہ اسرائیلی فوج نے جزیرہ النقب کے وارڈ 4 میں بھی قیدیوں پر دھاوا بولا اور قیدیوں کو ان کے کمروں سے باہر نکال کر انہیں تشدد کا نشانہ بنایا۔
اسیران اسٹڈی سینٹر کے ترجمان ریاض الاشقر نے بتایا کہ کشیدگی کے بعد جزیرہ النقب کے وارڈ 4 کے اسیران کو 3 اور 7میں منتقل کردیا گیا۔ اسرائیلی حکام کی طرف سے الزام عائد کیا گیا ہے کہ جزیرہ النقب میں اسلامی تحریک مزاحمت (حماس) کے اسیران نے جیلروں پر حملہ کیا۔ زخمی ہونے والے اہلکاروں کو درمیانے درجے کے زخم آئے ہیں۔