(روزنامہ قدس ۔آن لائن خبر رساں ادارہ) فلسطینی لڑکی اسراء کی موت بالکونی سے گرنےسے نہیں ہوئی اسے گھریلو تشدد کے بعد غیرت کے نام پر قتل کیا گیا ہے۔
پولیس کی جانب سے جاری کردہ تحقیقاتی رپورٹ میں بتایا گیا ہے کہ "اسراء الغریب” کو گھریلو تشدد کا نشانہ بنایا گیا ہے کہ جو اس کی موت کا باعث بنا۔
بیت الحم کی رہائشی اکیس سالہ فلسطینی دوشیزہ کی گزشتہ ماہ منگنی ہوئی تھی، حال ہی میں اس کی لاش پوسٹ مارٹم کے لیے اسپتال منتقل کی گئی تو اس کے جسم پر تشدد کے واضح نشانات موجود تھے، قتل کے الزام میں سیکیورٹی اداروں نے مقتولہ کے تین رشتہ داروں کو گرفتار بھی کیا ہے۔
خیال رہے کہ فلسطینی دوشیزہ کی موت کے بعد اہلخانہ کی جانب سے میڈیا کو یہ بیان دیا گیا تھا کہ ان کی بیٹی اسراء کا ذہنی توازن درست نہیں تھا جس کے باعث اس نے بالکونی سے چھلانگ لگادی، بعدازاں انہوں نے مؤقف تبدیل کرتے ہوئے دل کے دورے کو اسراء کی موت کا باعث قراردیا۔
فلسطینی اٹارنی جنرل اکرم الخطیب نے بتایا کہ اسراء کے اہل خانہ نے یہ تمام کہانیاں مقتولہ کے قتل کی پردہ پوشی کےلیے گڑھی تھیں۔
نفسیاتی اوراعصابی امراض کے ایک ماہر "ڈاکٹر توفیق سلمان” نے العربیہ سے گفتگو کرتے ہوئے کہا کہ اسراء الغریب کے طبی ریکارڈ سے ایسا کوئی اشارہ نہیں ملا جس سے یہ ظاہر ہو کہ وہ کسی ذہنی عارضے میں مبتلا تھیں۔
مقامی ذرائع کا کہنا ہے کہ اسراء غریب اپنے منگیتر اور بہن کے ہمراہ رات کو کھانا کھانے گئی تھی جس پر اس کے چچا زاد بھائیوں اور چچا نے غصے میں اسراء کے والد سے کہا کہ تمہاری بیٹی نے خاندان کی عزت کو مٹی میں ملادیا ہے۔