مرکزاطلاعات فلسطین کے مطابق برلن میں فروری کے دوران غزہ کی پٹی پر اسرائیل کی مسلط کردہ جنگ کے حوالے سے ہفتہ بھر کی تقریبات کے بعد اب مقامی تنظیموں، سول سوسائٹی اور وہاں پرمقیم فلسطینی تارکین وطن اب ہفتہ اسیران فلسطین بھی منا رہے ہیں۔
برلن میں فلسطینی اسیران کے ساتھ یکجہتی کے حوالے سے 17 اپریل کو ایک بڑے سیمینار اور جلسے کا بھی اہتمام کیا گیا ہے جس میں بڑی تعداد میں شہریوں کی شرکت کی توقع کی جا رہی ہے۔ سیمینار میں مختلف فلسطینی اور مقامی شخصیات خطاب کریں گی۔ اس دوران فلسطینی قیدیوں سے اظہار یکجہتی کے لیے قراردادیں بھی منظور کی جائیں گی۔
مرکزاطلاعات فلسطین کے نامہ نگاروں کے مطابق گذشتہ روز برلن کے قریب میلانو کے مقام پر واقع کلچرل سینٹر میں ایک سیمینار کا اہتمام کیا گیا جس میں بڑی تعداد میں انسانی حقوق کے مندوبین نے شرکت کی۔ سیمینار میں فلسطینی اسیران پراسرائیلی جیلوں میں ڈھائے جانے والے مظالم کے حوالے سے ایک نمائش کا بھی اہتمام کیا گیا۔
ادھر بیلجیم، فرانس، اٹلی اور آسٹریا کے دارالحکومت ویانا میں بھی ہفتہ اسیران فلسطین کے حوالے سے تقریبات منائی جا رہی ہیں۔ اس بار ان تقریبات میں شام میں واقع فلسطینی پناہ گزینوں کے سب سے بڑے کیمپ’’یرموک‘‘ کے محصورین کے ساتھ بھی مکمل یکجہتی کا اظہار کیا گیا ہے۔
بیلجیم میں 18 اپریل بروز ہفتہ ایک احتجاجی ریلی کا بھی اعلان کیا گیا ہے جس کی تیاریاں جاری ہیں۔ یورپ میں سرگرم فلسطین کانفرنس کے چیئرمین ماجد الزیر نے میڈیا کو بتایا کہ یورپی ممالک میں مقیم فلسطینی تارکین وطن اس سال ہفتہ اسیران فلسطین کے حوالے سے زیادہ سرگرم دکھائی دیے ہیں۔ یورپ کے کئی ملکوں میں فلسطینی قیدیوں کے ساتھ اظہار یکجہتی کے حوالے سے تقریبات کا اہتمام کیا گیا ہے۔
درایں اثناء جرمنی میں فلسطینی سوسائٹی کے سربراہ ڈاکٹر سہیل ابو شمالہ نے بتایا کہ جرمنی میں ایک ہفتے تک فلسطینیوں کے ساتھ یکجہتی کی تقریبات منعقد کی جائیں گی۔ ان کا کہنا تھا کہ فلسطینی اسیران کے ساتھ اظہار یکجہتی کی تقریبات میں صہیونی عقوبت خانوں میں بند فلسطینیوں کے حقوق کے لیے موثر انداز میں آواز اٹھائی جائے گی۔
خیال رہے کہ فلسطین میں 17 اپریل کو اسیران کے قومی دن کے طورپر منانے کی تیاریاں جاری ہیں۔ اس حوالے سے یورپ میں بھی مقیم فلسطینی اس مہم میں بڑھ چڑھ کر حصہ لے رہےہیں۔
بشکریہ:مرکزاطلاعات فلسطین