فلسطین کے مقبوضہ مغربی کنارے میں فلسطینی صدر محمود عباس کے زیر کمانڈ سیکیورٹی فورسز کی جانب سے سیاسی جماعتوں کے کارکنوں کے خلاف کریک ڈاؤن جاری ہے۔ اطلاعات کے مطابق پیر کے روز نابلس شہر سے اسلامی تحریک مزاحمت "حماس” کے پانچ کارکن گرفتارکر لیے ہیں۔
یہ گرفتاریاں اس وقت ہوئیں جب عباس ملیشیا نے نابلس میں النجاح یونیورسٹی کی ایک جامع مسجد کے خطیب پر فائرنگ کی تاہم وہ فائرنگ میں محفوظ رہے۔
مرکز اطلاعات فلسطین کے مطابق عباس ملیشیا کے اہلکاروں نے پیر کے روز نابلس میں النجاح یونیورسٹی کے ایک ہاسٹل پر بھی چھاپہ مارا۔ چھاپے کی اس کارروائی کے دوران حماس کے طلباء ونگ اسلامک بلاک کے رکن عبدالرحمان اشتیہ کو بھی گرفتار کر لیا گیا۔
خیال رہے کہ عبدالرحمان اشتیہ کئی مرتبہ اسرائیلی جیلوں میں بھی زیرحراست رہ چکے ہیں۔ انہیں حال ہی میں اسرائیل نے جیل سےرہا کیا تھا۔ شہر میں گھر گھر تلاشی کی کارروائیوں کے دوران جن دیگر گرفتار شہریوں کی شناخت کی گئی ان میں عدی بری، ھانی صنوبر، شداد ابوعمشہ اور جہاد ناطور بتائے جاتے ہیں۔