مسلمانوں کے قبلہ اول میں کل جمعہ کے روز لاکھوں فرزندان توحید نے نماز جمعہ کے ساتھ نماز استسقاء بھی ادا کی۔ نماز جمعہ کے اجتماعات کے لیے مقبوضہ بیت المقدس، مغربی کنارے اور سنہ 1948ء کے مقبوضہ فلسطینی شہروں سے مسلمانوں کی بڑی تعداد نے شرکت کی۔
اس موقع پر مسجد اقصیٰ کے امام اور خطیب الشیخ یوسف ابو سنیہ نے خطاب کرتےہوئے کہا کہ فلسطینی اتھارٹی قوم کے دیرینہ حقوق اور مطالبات کے حوالے سے سخت دباؤ کا شکار ہے لیکن ہم اسے خبردار کرتے ہیں کہ کسی دباؤ میں آکر وہ بنیادی حقوق سے دستبردار ہونے کا فیصلہ نہ کرے۔
انہوں نے کہا کہ امن مذاکرات میں فلسطینیوں کے حق واپسی کو نظرانداز کرنے کی کوشش کی جا رہی ہے۔ ہم اس اہم حق کو کیسے نظرانداز کرسکتے ہیں۔ یہ ہمارا انفرادی اور اجتماعی دونوں طرح کاحق ہے۔ اس معاملے پرکوئی مذاکرات ہی نہیں ہونے چاہئیں کیں کہ واپسی کا حق ایک مسلمہ حق ہے جس پرکوئی حکومت یا ادارہ اپنی مرضی کا فیصلہ مسلط نہیں کرسکتا ہے۔مسجد اقصیٰ کے خطیب کا کہنا تھا کہ ہمیں اطلاعات ملی ہیں کہ فلسطینی اتھارٹی حق واپسی اور بیت المقدس کے بارے میں کمزوری کا مظاہرہ کرر ہی ہے۔
ہم یہ واضح کر دینا چاہتے ہیں کہ فلسطینی اتھارٹی کو قومی حقوق میں کسی قسم کا افراط وتفریط نہیں کرنے دیں گے۔ الشیخ ابوسنینہ نے تمام فلسطینیوں کے درمیان اختلافات بھلا کر باہمی اتحاد کی ضرورت پر زور دیا۔ انہوں نے کہا کہ دشمن ہماری بے اتفاقی سے ناجائزفائدہ اٹھا رہا ہے۔ ہمیں اپنی اس کمزوری کو فوری دور کرنا چاہیے۔ انہوں نے کہا کہ عرب ممالک اور فلسطینیوں کے درمیان پائے جانے والے اختلافات کے براہ راست منفی اثرات قبلہ اول پر مرتب ہو رہے ہیں۔ ہمیں قبلہ اول کو یہودیوں کے خطرات سے بچانے کے لیے عرب اور مسلم دنیا کے تعاون کی ضرورت ہے۔