مسجدا قصیٰ اسرائیل کے لیے ایٹم بم سے بھی زیادہ خطرناک ہے: صہیونی پولیس چیف

اسرائیلی کے انسپکٹر جنرل پولیس یوحنان ڈنینو نے قبلہ اول میں یہودی سیاسی رہنمائوں اور اہم شخصیات کے داخلے پر خبردار کرتے ہوئے کہا ہے کہ مسجد اقصیٰ اسرائیل کے لیے ایٹم بم سے بھی زیادہ خطرناک ہے۔ اسرائیلی کنیسٹ کے ارکان کو اس جگہ میں داخل ہونے سے سختی سے گریز کرنا چاہیے۔

مرکز اطلاعات فلسطین کے مطابق اسرائیلی آئی جی پولیس نے ان خیالات کا اظہار مقبوضہ بیت المقدس میں قائم اسرائیل کی ایک عبرانی یونیورسٹی میں ایک تقریب سے خطاب میں کیا۔ انہوں نے کہا کہ لوگ مجھ سے مسجد اقصیٰ کے بارے میں پوچھتے ہیں۔ میرا جواب یہ ہے کہ مسجد اقصیٰ اسرائیل کے لیے جوہری بم سے زیادہ خطرناک ہے۔

صہیونی پولیس چیف کا کہنا تھا کہ سنہ 2013 ء میں مسجد اقصیٰ پر کنٹرول کے حوالے سے اسرائیلی کنیسٹ میں پالیسی تبدیل کیے جانے کی قانون سازی افسوسناک تھی کیونکہ اس کے نتیجے میں مسلمانوں کو یہودیوں کے خلاف مشتعل کیا گیا۔ میں اس بات پر خبردار کرتا ہوں کہ اگر مسجد اقصیٰ میں یہودی شخصیات کی آمدو رفت کا سلسلہ جاری رہا تو اس کے سنگین نتائج برآمد ہو سکتے ہیں۔

یہودی پولیس چیف کا کہنا تھا کہ جب کوئی شخص جبل ہیکل میں داخل ہونے کی بات کرتا ہے تو وہ دراصل اسرائیل کی سلامتی کو دائو پر لگانے کی بات کر رہا ہوتا ہے۔ انہوں نے ایران کے جوہری بم تیار کرنے کی بھی مذمت کی اور کہا کہ ایران بھی اسرائیلی ریاست کے لیے ایک بڑا خطرہ ہے۔

بشکریہ:مرکزاطلاعات فلسطین