فلسطینی شہرغزہ کی پٹی میں قابض اسرائیلی فوج نے دراندازی کی کوشش کی، جسے مجاہدین نے منہ توڑ جوابی کارروائی کرتے ہوئے ناکام بنا دیا۔ ادھر دوسری جانب شمالی فلسطین کےعلاقے صحرائے نقب میں اسرائیلی حکام نے ایک راکٹ حملے کا دعویٰ کیا ہے۔
تاہم یہ معلوم نہیں ہو سکا کہ آیا اس حملے میں کوئی نقصان بھی ہوا ہے یا نہیں۔
اسرائیلی میڈیا کی رپورٹس کے مطابق ہفتے کوعلی الصباح اسرائیلی فوج کے ایک قافلے نے غزہ کے مشرق میں الشجاعیہ شہر میں دراندازی کی کوشش کی تاہم فلسطینی مزاحمت کاروں کی جوابی فائرنگ اور راکٹ حملوں کے بعد قابض فوج پسپا ہو گئی۔
مرکز اطلاعات فلسطین کے مطابق فلسطینی مزاحمتی تنظیم "ابوعلی مصطفیٰ بریگیڈ” نےصہیونی فوج کی دراندازی کی کوشش ناکام بنانے کا دعویٰ کیا ہے۔ تنظیم نے ہفتے کو صہیونی فوج پر”ہاون” طرز کے گھریلو دیسی ساختہ چار راکٹ حملے کرنے کی ذمہ داری قبول کی ہے۔ تنظیم نےدعویٰ کیا ہے کہ راکٹ حملوں سے صہیونی فوجی گاڑیوں کو سخت نقصان پہنچا ہے۔
فلسطینی عسکری تنظیم کی جانب سے جاری ایک بیان میں کہا گیا کہ اس کے جنگجوؤں نے صہیونی فوجیوں پر اس وقت راکٹوں سے حملہ کیا جب وہ شہر میں داخلے کے لیے آگے بڑھ رہے تھے۔صہیونی فوج پر اکٹ حملہ قابض فوج کی جارحیت اور فلسطینیوں کے خلاف جاری ریاستی دہشت گردی کا فطری ردعمل ہے۔
ادھر شمالی فلسطین میں صحرائے نقب میں جمعہ کی شام ایک راکٹ کے گرنے کی اطلاعات ہیں، تاہم اس راکٹ حملے میں کسی قسم کے جانے نقصان کی تصدیق نہیں ہو سکی ہے۔