غزہ پر اسرائیلی دہشتگردی کی ناقابل بیان کارروائیاں

(روز نامہ قدس ۔آنلائن خبر رساں ادارہ) غزہ کے سرکاری میڈیا آفس نے اعلان کیا کہ غیر قانونی صیہونی ریاست اسرائیل کے 15 ماہ کے جارحانہ حملوں کے نتیجے میں ہونے والے وسیع پیمانے پر تباہی اور جانی و مالی نقصانات کی وجہ سے غزہ کو "انسانی بحران کا شکار علاقہ” قرار دیا گیا ہے، اور اس بات کی تصدیق کی کہ زندگی کے بنیادی تقاضوں کا فقدان ہے جہاں موجودگی حالات میں زندگی ناقابل رہائش ہے۔

غیر قانونی صیہونی ریاست اسرائیل کی 470 دنوں کی جنگ کے نتیجے میں غزہ میں ہونے والی بے مثال تباہی کے حجم کو ظاہر کرنے والے ایک خوفناک خلاصے میں، غزہ کے سرکاری میڈیا آفس نے ابتدائی نقصانات کو 38 ارب ڈالر سے زیادہ قرار دیا ہے، جو زندگی کے ہر پہلو کو نشانہ بنانے والی ایک منظم تباہی اور نسل کشی کا نتیجہ ہے۔

اعداد و شمار کے مطابق، غیر قانونی صیہونی ریاست اسرائیل کی فوجوں نے غزہ پر تقریباً 100,000 ٹن دھماکہ خیز مواد گرایا، جس کے نتیجے میں 90% بنیادی ڈھانچہ تباہ ہو گیا۔ رہائشی شعبے میں تقریباً 440,000 رہائشی یونٹس مکمل یا جزوی طور پر متاثر ہوئے ہیں، جس کی وجہ سے وہ رہنے کے قابل نہیں رہے۔

بنیادی خدمات کا بنیادی ڈھانچہ بھی تباہ ہو گیا ہے، جس میں 330,000 میٹر پانی کی فراہمی کے نیٹ ورک، 650,000 میٹر سے زیادہ سیوریج کے نیٹ ورک، تقریباً 2.8 ملین میٹر سڑکوں اور گلیوں کے نیٹ ورک، اور 3,700 کلومیٹر بجلی کے نیٹ ورک شامل ہیں۔

صیہونی فوج کی دہشتگردی سے غزہ میں ہونے والے جانی نقصان جو اب تک جاری ہے وہ 48 ہزار سے تجاوز کر گیا ہے جس میں 17 ہزار سے زائد بچے اور 13 ہزار سے زائد خواتین شامل ہیں جبکہ ایک لاکھ سے زائد زخمی ہیں۔