غزہ: ملبے میں دبا ناکارہ اسرائیلی بم پھٹنے سے ایک فلسطینی شہید، سات زخمی

فلسطینی جنگ زدہ شہر غزہ کی پٹی کے شمال میں جمعہ کے روز اسرائیلی فوج کا پہلے سے داغا گیا ایک ناکارہ بم دھماکے سے پھٹ گیا جس کے نتیجے میں ایک فلسطینی شہید اور کم سے کم سات زخمی ہو گئے۔

 

 فلسطینی طبی ذرائع نے مرکز اطلاعات فلسطین کو بتایا  کہ جمعہ کو علی الصباح غزہ کے شمال میں بیت لاھیا کے مقام پر اسلامی تحریک مزاحمت [حماس] کے ملٹری ونگ عزالدین القسام بریگیڈ کے منہدم کمپاؤنڈ سے ملبہ ہٹانے کے دوران ایک بم دھماکے سے پھٹ گیا، جس کے نتیجے میں موقع پر موجود ایک فلسطینی شہید اور سات زخمی ہوئے ہیں۔ذرائع نے بتایا ہے کہ دھماکے سے پھٹنے والا بم دو ہفتے قبل غزہ میں القسام بریگیڈ کے ایک مرکز پر بمباری کے دوران داغا گیا تھا۔ جو اس وقت ناکارہ ہو گیا تھا۔

 شہید شہری کا تعلق القسام بریگیڈ سے بتایا جاتا ہے جس کی شناخت مصطفیٰ حجازی کے نام سے ہوئی ہے، جبکہ زخمیوں میں مزاحمت کار اور عام شہری بھی شامل ہیں۔ زخمیوں کو کمال اسپتال منتقل کیا گیا ہے۔ جہاں ان کی حالت خطرے سے باہر بتائی جاتی ہے۔ چودہ سے اکیس نومبر کے درمیان آٹھ روزہ صہیونی جارحیت میں شہید ہونے والے فلسطینیوں کی تعداد 178 ہو چکی ہے۔

 

 

بشکریہ: مرکز اطلاعات فلسطین