(روز نامہ قدس ۔آنلائن خبر رساں ادارہ) غیر قانونی صیہونی ریاست اسرائیل کی فوج کے ترجمان نے ہفتے کی شام تصدیق کی کہ شمالی غزہ میں ہونے والی جھڑپوں کے دوران 4 فوجی ہلاک اور ایک افسر سمیت 2 اہلکار شدید زخمی ہوئے۔ اسرائیلی میڈیا کے مطابق، آج کے دن میں مجموعی طور پر 30 زخمیوں کو نکالا گیا، جن میں سے 11 کی حالت تشویشناک ہے۔
"یدیعوت احرونوت” کے مطابق، ایک اسرائیلی کمانڈر کی قیادت میں قافلے کو بارودی سرنگ اور فائرنگ کے حملے کا سامنا کرنا پڑا، جس میں 4 فوجی ہلاک اور 6 زخمی ہوئے۔ یہ حملہ اس راستے پر کیا گیا جسے فوج محفوظ تصور کر رہی تھی۔ مزید تحقیقات میں یہ امکان زیر غور ہے کہ مزاحمت کار زیر زمین سرنگ کے ذریعے علاقے تک پہنچے۔
مزید برآں، "چینل 12” نے رپورٹ کیا کہ بیت حانون میں دوہرے حملے میں بارودی سرنگ کے دھماکے کے بعد فائرنگ کی گئی، جس سے زخمیوں اور ہلاک شدگان کو نکالنے کا عمل نہایت پیچیدہ اور مزاحمت کاروں کی فائرنگ کی زد میں رہا۔ حالیہ ہفتے میں، شمالی غزہ کے بیت حانون علاقے میں 10 اسرائیلی فوجی مارے جا چکے ہیں، جبکہ 7 اکتوبر 2023 کے بعد سے اسرائیلی فوجی ہلاک ہونے والوں کی تعداد 828 تک پہنچ گئی ہے۔