غرب اردن میں فلسطینی مزاحمت کے تناظر میں اسرائیلی فوج کی جنگی مشقیں

اسرائیل کے عبرانی ذرائع ابلاغ نے انکشاف کیا ہے کہ صہیونی فوج نے مقبوضہ مغربی کنارے کے مختلف مقامات پر تازہ جنگی مشقوں کا پلان ترتیب دیا ہے۔ یہ جنگی مشقیں غرب اردن میں فلسطینیوں کی جانب سے کسی نئی مزاحمتی تحریک کے تناظر میں کی جا رہی ہیں۔

اسرائیلی اخبار ’’معاریف‘‘ کی رپورٹ کے مطابق خفیہ اداروں کی جانب سے یہ اطلاعات سامنے آئی ہیں کہ فلسطینی مغربی کنارے میں اسرائیلی قبضے کے خلاف ایک نئی تحریک شروع کرنے کی تیاری کررہے ہیں۔ ایسے میں فوج کو چوکس اور تیار رہنے کی ضرورت ہے۔

رپورٹ کے مطابق فوج آئندہ چند روز کے اندر اندر مغربی کنارے میں وسیع پیمانے پر فوجی مشقیں شروع کرے گی جن میں غرب اردن میں کشیدگی سے نمٹنے کے مختلف طریقے بتائے جائیں گے۔

اخبار لکھتا ہے کہ اسرائیلی سینٹرل کمانڈ 10 سال میں پہلی مرتبہ اس نوعیت کی جنگی مشقیں کرنے جا رہی ہے۔ ان جنگی مشقوں کا اصل ہدف اور مقصد فوج کو مقبوضہ مغربی کنارے میں کسی بھی ہنگامی حالت سے نمٹنے کے لیے تیار کرنا ہے۔

اخبار لکھتا ہے کہ سنہ 2014 ء فلسطینی مزاحمت کاروں کی جانب سے اسرائیلیوں پر حملوں کے حوالے سے قابل ذکر رہا ہے۔ صرف دسمبر 2014 ء میں غرب اردن اور بیت المقدس میں اسرائیلیوں پر 1866 حملے کیے گئے۔ جبکہ مجموعی طورپر 2014 ء میں 4500 کارروائیاں رجسٹرڈ کی گئیں جبکہ سنہ 2013 ء میں یہ تعداد 2672 تھی۔

بشکریہ:مرکزاطلاعات فلسطین