فلسطین کے مقبوضہ مغربی کنارے کے شمالی شہرنابلس میں عزموط، دیر الحطب اور سالم کے مقامات پر بنائی گئی یہودی کالونی”الون موریہ” میں خوفناک آتش زدگی کے بعد بڑی تعداد میں یہودیوں کو وہاں سے نکال لیا گیا ہے۔
ایک مقامی فلسطینی عہدیدار مراد عامر نے "مرکزاطلاعات فلسطین” کو بتایا کہ ہفتے کے روز "الون موریہ” نامی یہودی کالونی میں پراسرار آتش زدگی کا واقعہ پیش آیا۔ آگ نے کئی مکانات کو اپنی لپیٹ میں لے لیا۔ آتش زدگی کے واقعے کے بعد اسرائیلی فوج اور فائربریگیڈ کا عملہ جائے وقوعہ کی جانب روانہ ہوگیا تھا۔
اسرائیلی اخبار”ہارٹز” نے اپنی ویب سائیٹ پربتایا ہے کہ آتش زدگی کے نتیجے میں درجنوں مکانات جل کرخاکستر ہوگئے ہیں، تاہم کسی قسم کے جانی نقصان کی اطلاع نہیں ملی۔ کالونی میں رہائش پذیر یہودیوں کو محفوظ مقامات پرمنتقل کیا گیا ہے۔ آتش زدگی کی وجہ معلوم نہیں ہو سکی۔
بشکریہ:مرکزاطلاعات فلسطین