کراچی( ) غاصب صیہونی ریاست اسرائیل کی نابودی کا وقت دور نہیں جب قبلہ اول بیت المقدس پر پرچم حق لہرائے گا، حزب اللہ اور حماس کی عظیم الشان مزاحمت اور کامیابی نے اسرائیل کے ناقابل تسخیر ہونے کا بھرم خاک میں ملا دیا ہے۔
ان خیالات کا اظہار مقررین نے امامیہ اسٹوڈنٹس ّرگنائزیشن پاکستان کراچی ڈویژن کی جانب سے نمائش تا ریگل چوک نکالی جانےوالی” مرکزی آزادی القدس ریلی” میں تبت سینٹر پر منعقدہ جلسے سے خطاب کرتے ہوئے کیا۔ مقررین میںامامیہ اسٹوڈنٹس آرگنائزیشن پاکستان کے مرکزی صدر برادر سید حسن زیدی، معروف عالم دین مولانا باقر زیدی ، مولانا مرزا یوسف حسین ، جمعیت علمائے پاکستان کے رہنما قاضی احمد نورانی جعفریہ الائنس پاکستان کے رہنما علامہ آفتاب حیدر جعفری اور مولانا منور علی نقوی شامل تھے۔ ریلی میں ہزاروں کی تعداد میں مرد و خواتین، بزرگوں اور بچوں نے کثیر تعداد میں شرکت کی اور امام خمینی ؒ کی آواز پر لبیک کہتے ہوئے اس عزم کا اعادہ کیا کہ قبلہ اوّل بیت المقدس کی آزادی اور غاصب صیہونی ریاست اسرائیل کی نابودی تک صدائے احتجاج بلند کرتے رہیں گے۔ آزادی القدس ریلی سے خطاب کرتے ہوئے امامیہ اسٹوڈنٹس آرگنائزیشن پاکستان کے مرکزی صدر برادر سید حسن زیدی نے کہاکہ وہ دن دور نہیں کہ جب یہ دنیا اسرائیل کے ناپاک وجود سے پاک ہوگی، اللہ کا وعدہ ہے ــــ”بیشک اللہ کا گروہ ہی غالب آنے والا ہے” ،ہم نے قرآن کی اس آیت کا مصداق لبنان میں حزب اللہ اور فلسطین میں حماس کی کامیابی کی صورت میں دیکھ لیا ہے، امام خمینی ؒ کی بدولت عالم اسلام آج اپنے اہم ترین مسئلے یعنی بیت المقدس کی آزادی کی طرف پلٹ چکا ہے، اور انشاء اللہ امت مسلمہ رہبر معظم آیت اللہ سید علی خامنہ ای کی با بصیرت قیادت میں بیت المقدس کو صیہونی قبضے سے نجات دلائے گی۔ 
مولانا باقر زےدی نے خطاب کرتے ہوئے کہا کہ غاصب صیہونی ریاست اسرائیل مسجد اقصیٰ کو منہدم کرکے وہاں پر ہیکل سلیمانی بنانے کا منصوبہ بنا رہی ہے ۔ قابل مذمت امر یہ ہے کہ ان تمام امور میں بے غیرت عرب و دیگر مسلم حکمران اپنی امریکی غلامی اور اسرائیل دوستی کا ثبوت دیتے ہوئے خاموش تماشائی بنے ہوئے ہیں۔ہم ان بے غیرت عرب و دیگر مسلم حکمرانوں کو متنبہ کرتے ہیں کہ اپنی ریاستوں کے عوام کی ترجمانی کرتے ہوئے امریکی غلامی سے نجات حاصل کریں کہیں ایسا نہ ہو کہ ان حکمرانوں کا حشر بھی صدام جیسا ہو۔ مولانا مرزا یوسف حسین نے شرکاء سے خطاب کرتے ہوئے کہا کہ پاکستان کو امریکی کالونی بنانے کا منصوبہ فی الفور ترک کیا جائے ۔بدنام زمانہ بلیک واٹر (Black Water) کے کارندوں کی پاکستان آمد وطن عزےز کے عوام کے لئے تشویش کا باعث ہے۔ ڈرون حملے،خودکش حملے اور فرقہ واریت امریکی سامراج کی جانب پاکستانیوں کے لئے اپنی آمد کا ایک تحفہ ہے۔ جعفریہ الائنس پاکستان کے رہنما علامہ آغا آفتاب حیدر جعفری نے کہا کہ آخر کیوں اسرائیلی درندگی اقوام متحدہ اور نام نہاد انسانی حقوق کی دعوےدار تنظیموں کو نظر نہیں آتی، آئے دن نہ جانے کتنے بچے یتیم اور نہ جانے کتنے والدین بے اولاد ہوجاتے ہیں۔ امام خمینی ؒ کی بابصیرت قیادت نے اس اہم مسئلے کو اتنی اہمیت دی کہ آج دنیا بھر میں یوم القدس منایا جا رہا ہے اور حزب اللہ اور حماس کی حمایت کی جارہی ہے۔ معروف عالم دین مولانا منور علی نقوی نے کہا کہ یہ بات روز روشن کی طرح عیاں ہے کہ اسرائیل فلسطین میں کس طرح ظلم و بربریت کا مظاہرہ کررہا ہے، پاکستان کے عوام نے ہمیشہ غاصب صیہونی ریاست اسرائیل کی مخالفت اور فلسطینیوں کے مؤقف کی حمایت کی ہے اور ہر فورم میں ان کے حق میں آواز بلند کی ہے۔ علامہ قاضی احمد نورانی نے کہا کہ مسئلہ فلسطین عالم اسلام کا عظیم ترین مسئلہ ہے، مسئلہ فلسطین کوآج کے معاشرے میں زندہ رکھنا بھی بہت بڑا جہاد ہے، آج مسئلہ فلسطین عالمی سیاست کا مرکز و محور بنا ہوا ہے اس وقت عالمی سیاست غیر معمولی طور پر متحرک اور سمٹی ہوئی ہے اور اس عالمی سیاست اور مجوزہ عالمی کشمکش کا محور اسلام ہے، لیکن امت مسلمہ اپنے اتحاد سے عالمی استعمار کے عزائم کو خاک میں ملا دے گی۔ ریلی کے اختتام پر قراردادیں مولانا منور علی نقوی نے پیش کیں جبکہ شرکاء نے امریکہ اور اسرائیل کے پرچم بھی نذر آتش کئے ۔ 