صیہونی فوجیوں کے ہاتھوں غرب اردن میں فلسطینی شہری کو شہید

الخلیل (روز نامہ قدس ۔آن لائن خبر رساں ادارہ) صیہونی فوجیوں نے غرب اردن کے شہر الخلیل میں کریات اربع کالونی کے قریب ایک فلسطینی نوجوان کو گولی مار کر شہید کر دیا۔

روز نامہ قدس کو موصول ہونے والی اطلاعات کے مطابق اسرائیلی فوجیوں نے 27 سالہ یاسر فوزی الشویکی کو ’’کریات اربع‘‘ صیہونی کالونی کے قریب وادی الحصین میں گولیاں ماریں۔ اسرائیلی فوج نے حسب معمول دعویٰ کیا ہے کہ مقتول نے فائرنگ سے قبل صیہونی آباد کاروں پر چاقو سے حملے کی کوشش کی تھی۔

ادھر سوشل میڈیا پر شہید فلسطینی تصویر کے ساتھ ایک فوٹیج گردش کررہی ہے جس میں شہید فلسطینی نوجوان کو ’’ بیت ھشالوم‘‘ میں ایک گھر میں مردہ حالت میں دیکھا جاسکتا ہے۔ اس کے قریب اسرائیلی فوجیوں کو چلاتے سنا جاسکتا ہے جو کہہ رہیں’’الحمد للہ اس کا کام تمام ہوگیا‘‘۔

اسی فوٹیج میں ایک صیہونی خاتون کو عبرانی چلاتے سنا جاسکتا ہے جو چیخ چیخ کہہ رہی ہے کہ ’’ وہ عمارت کے اندر ہے، وہ عمارت کےاندر ہے‘‘۔

مقتول فلسطینی کے کاغذات اس کے ارد گرد پھیلے ہوئے ہیں اور ایک بڑا چاقو بھی عمارت کے دروازے پر پڑا ہے۔ فلسطینی ذرائع کا کہنا ہے کہ مقتول فلسطینی الخلیل میں آئینی عدالت کا محرر بتایا جاتا ہے۔