رام اللہ (روز نامہ قدس ۔آن لائن خبر رساں ادارہ) فلسطین کے مقبوضہ مغربی کنارے کے وسطی شہر رام اللہ میں دیر دبوان کے مقام پر صیہونی شرپسندوں نے ایک مسجد کی بیرونی دیواروں پر اشتعال انگیز نعروں کی چاکنگ کی ہے جس پر فلسطینی عوامی اور مذہبی حلقوں میں سخت غم وغصے کی فضاء پائی جا رہی ہے۔
روز نامہ قدس کو موصول ہونے والی اطلاعات کے مطابق علی الصباح صیہونی آباد کاروں نے مسجد دیر دبوان کی بیرونی دیواروں پر عرب اور مسلمان مردہ باد کے نعروں کے ساتھ مسجد پر کیمیائی مواد کا کیمیکل چھڑکا۔ اس کے علاوہ مسجد کی دیواروں پر یہودیوں کی مذہبی علامت ریڈ کریسنٹ کی تصاویر بنائی گئیں۔
فلسطینی وزیر اوقاف نے صیہونی آباد کاروں کے ہاتھوں مسجد کی بے حرمتی کی شدید مذمت کرتے ہوئے اسے نسل پرستانہ اور اشتعال انگیز اقدام قرار دیا ہے۔ ان کا کہنا تھا کہ فلسطین میں موجود تمام عبادت گاہیں صیہونی مجرموں کی وجہ سے غیر محفوظ ہوگئی ہیں۔