(فلسطین نیوز۔مرکز اطلاعات) فلسطین کے مقبوضہ بیت المقدس میں ایک شخص نے چاقوکے وار کرکے ایک یہودی آباد کار کو شدید زخمی کردیا ہے۔اسرائیلی پولیس نے دعویٰ کیا ہے کہ حملہ آور ایک فلسطینی ہے جسے حراست میں لے لیا گیا ہے۔
فلسطین نیوز کو موصول ہونے والی اطلاعات کے مطابق اسرائیلی پولیس کی خاتون ترجمان لوبا السمری نے ایک بیان میں بتایا کہ سوموار کو مغربی بیت المقدس میں شاہراہ الانبیا پر ایک پٹرول پمپ کے قریب مشتبہ فلسطینی نوجوان نے ایک اسرائیلی پر چاقو سے حملہ کیا جس کے نتیجے میں وہ شدید زخمی ہوگیا۔ پولیس نے فوری کارروائی کرتے ہوئے حملہ آور کو گرفتار کرلیا ہے۔ترجمان کا کہنا ہے کہ زخمی یہودی آباد کو علاج کے لیے ایک مقامی اسپتال منتقل کردیا گیا ہے۔ السمری نے بتایا کہ واقعے کے فوری بعد پولیس اور سیکیورٹی فورسز کے اہلکاروں کی بڑی تعداد جائے وقوعہ پر پہنچ گئی۔ حملہ آور کو گرفتار کرنے کے بعد تفتیش کے لیے نامعلوم مقام پر منتقل کردیا گیا ہے۔
خیال رہے کہ فلسطین میں پچھلے سال اکتوبر میں تحریک انتفاضہ القدس کے عنوان سے ایک نئی تحریک شروع ہوئی تھی۔ اس تحریک کے دوران اب تک یہودی آباد کاروں اور غاصب صہیونیوں پر چاقو کے حملوں کے دسیوں واقعات رونما ہوچکے ہیں۔