اسرائیلی فوج کی بڑی تعداد میں مقبوضہ مشرقی القدس میں موجودگی کے بعد اہالیان القدس اور صہیونی فورسز کے مابین جھڑپیں جاری ہیں۔
صہیونی فورسز کی بڑی تعداد مسجد اقصی پر حملہ کرنے والے یہودی آباد کاروں کی حفاظت کےلیے کل سے یہاں موجود ہے۔
ذرائع کے مطابق شہر کے مختلف علاقوں میں حالات اس وقت کشیدہ ہو گئے جب اسرائیلی فوج نے جگہ جگہ فلسطینی شہریوں کو تنگ کرنا شروع کر دیا جس پر مشتعل فلسطینیوں نے اسرائیلی فورسز پر پتھراؤ شروع کر دیا۔
جن علاقوں میں جھڑپیں ہوئیں ان میں یہودی بستی ’’ھارھزیتیم‘‘ کی قریبی رأس العامود کالونی کی جھڑپوں میں تین فلسطینی نوجوان شدید زخمی ہو گئے ہیں۔ اسرائیلی فوج نے یہاں نوجوانوں پر اشک آور گیس کے شیلوں کی بوچھاڑ کر دی۔ علاقے سے ایک سترہ سالہ نوجوان ابو ناب کو بہیمانہ تشدد کا نشانہ بنا کرحراست میں بھی لے لیا گیا۔
سلوان کے علاقے کی دفاعی کمیٹی کا کہنا ہے کہ مسجد اقصی اور الساھرہ درواز کے مابین واقع باب حطہ کے قریب بھی فلسطینیوں اور اسرائیلی فوج کے درمیان شدید جھڑپیں ہوئی ہیں۔ العیسویہ کے کچھ علاقوں سے بھی جھڑپوں کی اطلاعات موصول ہوئی ہیں۔
بشکریہ: مرکز اطلاعات فلسطین