اسرائیلی فوج اور پولیس اہلکاروں نے منگل کی شام مقبوضہ بیت المقدس کے شمال مشرقی عناتا ٹاؤن پر دھاوا بولا اور فہیدات کالونی کے تمام مکینوں کو گھر خالی کرنے کے نوٹسز جاری کر دیے۔
مقامی ذرائع نے بتایا کہ اسرائیلی فوج کے زیر نگرانی کام کرنے والی شہری انتظامیہ نے فہیدات کالونی پر ہلہ بولا اور کالونی کے مکینوں کو بغیر اجازت تعمیرات کرنے کے الزام میں اپنے گھر منہدم کرنے کے احکامات سنا دیے۔
ذرائع نے بتایا کہ جاری کیا گیا نوٹس میں تیرہ مکانات اور دس سے زیادہ جانوروں کے تعمیر کیے گئے باڑوں کو گرانے کا کہا گیا ہے۔ ذرائع نے بتایاکہ یہ ساری کالونی فہدیدات خاندان کی زیرملکیت ہے ۔ اس کالونی کو منہدم کرنے کی صورت میں ساٹھ افراد بے گھر ہو جائیں گے اور فلسطینیوں کی پچاس ایکڑ اراضی ہتھیا لی جائے گی۔
مقامی ذرائع نے بتایا کہ اسرائیل کا مقصد اس ساری کالونی کو مکمل طور پر ختم کرنا ہے کیونکہ یہ کالونی اسرائیلی فوجی اڈے کے قریب واقع ہے۔ اسرائیلی فوجی اڈا اس کالونی سے صرف چند میٹر کے فاصلے پر ہے۔
ذرائع نے بتایاکہ اسرائیل گزشتہ کئی سالوں نے اس کالونی کے مکینوں کو ہجرت پر مجبور کرنے کی کوشش کر رہا تھا۔ صہیونی حکام اس کالونی کی اراضی کو بھی عسکری مقاصد کے لیے استعمال کرنا چاہتے ہیں۔ یہ منصوبہ بھی القدس کو یہودیانے کے صہیونی پروگرام کا ہی ایک حصہ ہے۔ ذرائع نے بتایا کہ اسرائیلی شہری انتظامیہ نے کالونی کے تمام گھروں اور مویشیوں کے باڑوں کی تصاویر اتار لی ہیں۔ حکام نے فلسطینیوں کو گھروں کو گرانے کے لیے سات فروری تک کی مہلت دی ہے۔
بشکریہ:مرکز اطلاعات فلسطین