’’القدس فاؤنڈیشن انٹرنیشنل‘‘نے اقوام متحدہ کی تعلمی، سائنسی و ثقافتی تنظیم ’یونیسکو‘ سے مطالبہ کیا ہے کہ وہ القدس کے تاریخی ورثے کی حفاظت کرے اور اسرائیل کو قبلہ اول مسجد اقصی کے امور میں مداخلت سے روکے۔ فاؤنڈیشن نے عالمی تنظیم سے صہیونی حکام کو مسجد اقصی کے مراکشی دروازے کا پل گرانے سے باز رکھنے کی اپیل بھی کی۔
ذرائع ابلاغ کو جاری کردہ بیان میں القدس فاؤنڈیشن نے قبلہ اول مسجد اقصی کے مراکشی دروازے کے پل کو گرانے کےاسرائیلی فیصلے پر عمل درآمد روکنے کے لیے یونیسکو کی فوری مداخلت پر زور دیا۔ فاؤنڈیشن کا کہنا تھا کہ القدس کا معاملہ پورے خطے کے استحکام کے لیے انتہائی اہم ہے، علاقے کے تمام سیاسی معاملات کا محور یہ مقدس شہر ہے۔
عالمی القدس فاؤنڈیشن کے ڈائریکٹر یاسین حمود کا کہنا تھا کہ یونیسکو میں فلسطین کی مستقل رکنیت فلسطینی قوم کو انصاف کی فراہمی کے لیے درست سمت اقدام ہے۔
حمود نے فلسطینی اتھارٹی کیجانب سے اس ضمن میں اپنا کردار ادا کرنے کی ضرورت پر بھی زور دیا. انہوں نے کہا مراکشی دروازے کی جانب آنے والے راستے کے انہدام کو روکنے کے لیے یونیسکو کے ساتھ متحد ہو کر معاملات کرنے کا وقت آگیا ہے۔اس اہم موقع پر فلسطینی قوم کے درمیان تقسیم شدید نقصان کا باعث ہوگی۔