مغربی کنارے کے شہر الخلیل کے شمالی مہاجر کیمپ ’’العروب‘‘ کے داخلی راستے اور میدان میں فلسطینیوں اور اسرائیلی فوج کے درمیان خوفناک جھڑپیں ہوئیں جس میں ایک اسرائیلی خاتون فوجی شدید زخمی ہو گئی ہے۔ مغربی کنارے کے مختلف علاقوں سے بھی جھڑپوں کی اطلاعات موصول ہوئیں ہیں
جھڑپیں اسرائیلی جیلوں میں قید فلسطینی اسیران پر ڈھائے جانے والے مظالم بالخصوص معروف فلسطینی اسیر میسرہ ابو حمدیہ کی جیل میں موت، کے خلاف نکالے جانے والے احتجاجی مظاہروں کو روکنے کی اسرائیلی کوشش پر شروع ہوئیں۔
اب تک ان جھڑپوں میں مغربی کنارے کے مختلف مقامات سے گیارہ فلسطینی زخمی ہو گئے ہیں۔ اسرائیلی فوج نے احتجاج کرنے والوں کو ربڑ کی گولیوں سے نشانہ بنایا۔ اس موقع پر بہت سے فلسطینیوں نے اسیران سے یک جہتی میں بھوک ہڑتال کرنے کا اعلان بھی کیا گیا۔
عینی شاہدین نے بتایا کہ اسرائیلی فوج کےساتھ جھڑپیں الحو اور حلحول کے علاقے کی شاہراہ پر ہوئیں، صہیونی اہلکاروں نے فلسطینیوں کو منتشر کرنے کے لیے زہرہلی گیس کا استعمال بھی کیا۔
بشکریہ:مرکز اطلاعات فلسطین