اسرائیل کا حساس علاقے کی فضائی حدود میں فلسطینی ڈرون طیارے کی پرواز کا دعویٰ

اسرائیل کے عبرانی ذرائع ابلاغ نے حکومتی ذرائع کے حوالے سے رپورٹس میں دعویٰ کیا ہے کہ گذشتہ روز مشرقی غزہ سے متصل یہودی کالونی اشکول کی فضاء میں ایک مشتبہ ڈرون طیارے کو دیکھا گیا ہے جو پرواز کے بعد کامیابی سے واپس بھی لوٹ گیا۔

اسرائیلی فوج کی مقرب نیوز ویب سائیٹ ’’ 0404 ‘‘ کی جانب سے جاری ایک رپورٹ میں بتایا گیا ہے کہ غزہ کی پٹی سے مبینہ طور پر ایک جاسوس طیارہ اشکول کی فضاء میں بھیجا گیا تھا۔ مشتبہ ڈرون طیارہ نظر آتے ہی اسرائیلی فضائیہ حرکت میں آگئی مگر فضائیہ کی کارروائی تک ڈرون واپس جا چکا تھا۔

رپورٹ میں ذرائع کے حوالے سے بتایا گیا ہے کہ بغیر پائلٹ کے ایک چھوٹا ڈرون طیارہ غزہ کی پٹی سے بھیجا گیا تھا۔

ایک دوسرے ذرائع کا کہنا ہے کہ اشکول یہودی کالونیوں کی فضائی حدود میں دو سے تین بغیر پائلٹ کے ڈرون طیارے دیکھے گئے ہیں۔ اسرائیل کے جنگی طیاروں کی پرواز سے قبل ہی وہ واپس بھی آگئے تھے۔

ایک عبرانی ذریعے نے براہ راست اسلامی تحریک مزاحمت ’’حماس‘‘ پر ڈرون طیارے اسرائیل کی فضائی حدود میں چھوڑنے کا دعویٰ کیا ہے۔ ذرائع کا کہنا ہے کہ حماس کی جانب سے اسرائیل کی جاسوسی کے لیے ڈرون طیاروں کا مسلسل استعمال جاری ہے اور اس کے طیارے جاسوسی پروازوں کے بعد بہ حفاظت واپس اپنے ٹھکانوں پر پہنچ جاتے ہیں۔

بشکریہ:مرکزاطلاعات فلسطین