اسرائیلی سکیورٹی فورسز کے اہلکاروں کے ایک بڑے گروہ نے مقبوضہ بیت المقدس میں مسجد اقصی میں گھس کر مسلمانوں کے اس تیسرے مقدس ترین مقام کی بے حرمتی کی ہے۔ صہیونی اہلکاروں کے قبلہ اول میں گشت کرنے سے حالات انتہائی کشیدہ ہو گئے۔القدس کے امور کے ماہر تجزیہ کار جمال عمرو نے اتنی بڑی تعداد میں صہیونی اہلکاروں کے مسجد میں داخل ہونے کے عمل کو ایک انتقامی کارروائی قرار دیا ہے۔
ان کے مطابق گزشتہ روز مسجد میں موجود نمازیوں اور طلبہ و طالبات نے اسرائیلی انتہاء پسند رکن پارلیمان موشے ویجلن اور دیگر فوجی اہلکاروں کے گنبد صخرہ پر دھاوے کی کوشش کو ناکام بنا دیا تھا اور انہیں زبردستی مسجد کے احاطے سے نکال باہر کیا تھا۔ چنانچہ آج صہیونی سکیورٹی فورسز کے اہلکاروں نے مسجد میں موجود طلبہ اور طالبات کا جائزہ لینے کے لیے مسجد پر دھاوا بولا ہے۔
جمال عمرو نے کہا کہ ایک جانب قبلہ اول اور مسلمانوں کے دیگر مقدس مقامات پر اسرائیلی حملے بڑھتے جا رہے ہیں تو دوسری جانب امت مسلمہ نے اپنے مسجد اقصی کی حفاظت کے لیے یہاں پر صرف چند خواتین کو بھیج رکھا ہے۔ جن کے تحفظ کے لیے بھی کوئی موجود نہیں۔ انہوں نے خدشہ ظاہر کیا کہ اسرائیلی فوج کسی بھی وقت مسجد میں موجود ان طالبات کے خلاف کوئی کارروائی کر سکتی ہے۔
انہوں نے واضح کیا کہ اسرائیلی رہنما، عسکری قائدین اور سکیورٹی اہلکاروں کی جانب سے مسجد اقصی کے بڑھتے ہوئے دورے اسرائیل کی جانب سے مسجد اقصی پر قبضے کی پالیسی کا تسلسل ہے۔ صہیونی حکام کے مذموم عزائم کو ناکام بنانے کے لیے ساری امت مسلمہ کو متحد ہو کر اس کے خلاف محاذ بنانا ہو گا۔
بشکریہ:مرکز اطلاعات فلسطین